Қалалық білім басқармасының мәліметінше, мемлекеттік бағдарламаға сәйкес ағымдағы жылы 3-6 жастағы балаларды мектепке дейінгі білім берумен 100% қамту үшін мемлекеттік тапсырыспен қосымша 3 463 орынға балаларды орналастыруға 657 млн 738 мың теңге бөлінген. Сондай-ақ, жан басына қаржыландыру нормативіне сәйкес 1 балаға бөлінетін қаржы көлемін 27 502 теңгеге көтеру үшін 2 млрд 322 млн теңге қаржыға республикалық бюджетке сұраныс берілген.
Бұдан бөлек, шаһарда ерекше білім беруді қажет ететін балаларға арналған жекеменшік «Асыл бала» арнаулы балабақша-мектеп кешені іске қосылды. Балабақша ерекше білім беру қажет ететін балаларды бейімдеу, Халықаралық «UCMAS» (УСИМАС) ментальді арифметика әдістемесін үйрету бағытындағы жұмыстарды атқарады. Бүгінгі таңда аталған балабақшада 40 бала тәрбиеленуде.
Сондай-ақ, мемлекеттік балабақшалардың 45%-да немесе 36 балабақшада мектепке дейінгі ұйымдардағы тәрбиеленушілердің тілдік, танымдық, шығармашылық құзыреттілігін қалыптастыруға бағытталған арнайы интеллектуалды-дамытушы ойын кешенімен жабдықталған «Интеллектум» кабинеттері ашылған.