Шымкенттің даму бағдарламасы қабылданды

ШЫМКЕНТ. ҚазАқпарат - Миллионға жуық халқы бар Шымкенттің дамуы тұжырымдамалық бағдарламасы Шымкент қалалық мәслихатының кезектен тыс жиырма сегізінші сессиясында қаралып, қабылданды. Сессияға Шымкент қаласы әкімінің орынбасары Қайрат Нұртай мен қалалық мәслихат сессиясының депутаттары, аудан әкімдері және құрылымдық бөлім басшылары қатысты, деп хабарлайды ҚазАқпарат тілшісі.

Сессия тарихында алғаш рет Шымкент қаласы өңірлік мегаполисінің тұрақты және кеңістік дамуының тұжырымдамалық бағдарламасын қабылдау туралы ұсыныс айтылып, қала әкімінің орынбасары Тимур Баймұхановтың баяндамасы тыңдалды.

 «Мамыр айында Астана қаласында өткен форумда Елбасы Н.Назарбаев:«Мегаполистер дәуірі келе жатыр. Демек олардың арасында бәсекелестік пайда болады. Бұрын миллиондаған халқы бар қала Алматы болса, бүгінде олардың қатарында Астана мен Шымкентте бұл процестер жалғасады» деп мәлімдеді. Олай болса, біздің қаламызда тұрақты және кеңістік дамуының тұжырымдамалық бағдарламасы болуы керек. Бұл қажеттіліктен туындап отыр. Мегаполисті дамытудың қазіргі кезеңі тәжірибені қайта қарауға және бұрынғы жетістіктерді синтездеуге әрекет деп атауға болады», - деді қала әкімінің орынбасары.

 Қалалық мәслихаттың депутаттары Шымкент қаласының алып мегаполис болып, оның даму бағдарламасын бекіту туралы құжат тұңғыш көтеріліп отырғанын тілге тиек етті. Сондай-ақ,сессияда қаралған өзге де мәселелер депутаттар тарапынан қолдау тапты.