ОРАЛ. 28 желтоқсан. ҚазАқпарат - Шыңғырлау аудандық музыка мектебінің жаңа ғимараты пайдалануға берілді.
Жаңа ғимараттың ашылу рәсіміне қатысқан аудан әкімі Алдияр Халелов өтіп бара жатқан жылда ауданда әлеуметтік салаға ерекше көңіл бөлінгендігін атап өтті. Шыңғырлау-Ақсұғым су құбыры тартылып, Амангелді ауылына газ жеткізілді. Аудандық мәдениет және демалыс саябағы күрделі жөндеуден өткізілсе, Белогор ауылында мәдениет үйі мен 25 орындық балабақша іске қосылды. Полтава ауылын газдандыру мәселесі шешілді, мұнда алдағы жылы құбыр тарту жұмыстары басталатын болады. Аудандық музыка мектебінің ашылуы да осы шаралардың жалғасы іспеттес.
Музыка мектебінің директоры Айман Оразәлинаның айтуынша, ғимаратта балалардың өз өнерлерін дамытуына барлық жағдай жасалған. Бұдан бұрын да шетелдегі халықаралық байқаулардан олжалы оралып жүрген шыңғырлаулық өнерлі өрендер өз шеберліктерін ұштай түсетін болады.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).