Сирия билігі Эс-Сувейдадан әскерін шығара бастады

АСТАНА. KAZINFORM — Сирия үкіметі елдің оңтүстік-батысындағы Эс-Сувейда қаласынан әскери күштердің шығарылғанын хабарлады, деп хабарлайды DW.

Үкімет әскері жергілікті этникалық қауымдастық арасындағы қарулы қақтығыстарға байланысты аймаққа жіберілген.

Дамаск билігі друздармен жасалған атысты тоқтату келісімі аясында жауынгерлерді шығара бастады.

— Сирия армиясы қаланы заңсыз топтардан тазартуды аяқтағаннан кейін қабылданған келісім шарттарына сәйкес Эс-Сувейда қаласынан әскерлерін шығара бастады; полиция күштері оны бақылауды жүзеге асырады, — делінген Қорғаныс министрлігі таратқан хабарламада.

Аймақтағы жағдай өткен аптаның аяғында араб тайпалық жасақтары мен друздардың таудағы өзін-өзі қорғау бөлімшелері арасында қақтығыс басталғанда ушыға түсті. Кейінірек Сирия үкіметінің күштері жағдайды реттеу үшін қалаға кірді. Содан кейін Израиль друз халқын қорғау үшін Сирияның Дамасктегі әскери және стратегиялық нысандарына соққы бере бастады.

Сирияның уақытша президенті Ахмед аш-Шараа друздарды Сирияның ажырамас бөлігі деп атап, Израиль әрекетін айыптады.

— Біз соғыстан қорқатындардың қатарынан емеспіз. Біз өмірімізді қиындықтармен бетпе-бет келіп, халқымызды қорғаумен өткіздік, бірақ Сирия халқының мүддесін хаос пен жойылудан жоғары қойдық, — деп келтіреді аш-Шараа сөзін араб ақпарат құралдары.

Біріккен Ұлттар Ұйымының Қауіпсіздік Кеңесі 17 шілдеде Израильдің Сирияға жасаған шабуылдарын талқылау үшін шұғыл жиын өткізеді.

Сириядағы адам құқықтарын бақылау ұйымы белсенділерінің мәліметінше, аймақтағы қақтығыстардан 350-ден астам адам қаза тапқан. Ресми дереккөздер бұған дейін құрбан болғандар саны әлдеқайда аз болғанын хабарлаған болатын.

Друздар — мүшелері Сирия, Ливан, Израиль және Иорданияда тұратын этно-конфессиялық топ. Сирияның өзінде 700 мың друз бар.

Бұған дейін БҰҰ Бас хатшысы Израильдің Сириядағы әуе шабуылын айыптағанын жаздық.