Сирия қауіпсіздік мақсатында үш провинциядағы сайлауды кейінге қалдырды
АСТАНА.KAZINFORM - Жалғасып жатқан қауіпсіздік мәселелеріне байланысты Сирияның бірқатар өңірінде дауыс беру кейінге шегерілді, деп хабарлайды Kazinform агенттігінің меншікті тілшісі.
Сирияның халықтық кеңесі (парламент) Жоғарғы сайлау комиссиясы Сувейда, Хасек және Ракка провинцияларындағы қауіпсіздік мәселелеріне байланысты дауыс берудің кейінге қалдырылғанын жариялады, деп хабарлайды SANA ақпарат агенттігі.
Сайлау комиссиясының ресми өкілі Навар Наджменің айтуынша, аймақтарға тағайындалған мандат сайлау өткізілгенге дейін сақталады. Ал сайлау «қолайлы жағдай жасалып, қауіпсіз орта» қамтамасыз етілмейінше өтпейді.
- Бұл шешім осы провинциялар тұрғындарының әділ өкілдігі үшін, сондай-ақ сайлау тек қана мемлекет ресми мекемелерді толығымен бақылайтын және қауіпсіз ортаны қамтамасыз ететін аймақтарда өтуі керек екенін ескере отырып қабылданды, - деді ол.
Сувейдадағы қақтығыстар
Халықаралық агенттіктер атап өткендей, кейінге қалдыру туралы шешім, ең алдымен, шілдеде друз топтары мен сүнниттік бедуиндер арасында қанды қақтығыс болған Сувейда провинциясындағы жағдайға байланысты қабылданды.
Друздар – Сирия, Ливан және Израильдегі қауымдастықтар. Сувейда провинциясында олар сүннит тайпаларымен бірге халықтың басым бөлігі саналады. Бұл аймақта бұрыннан бері негізінен жер мәселесіне байланысты шиеленіс бар.
Жағдайды тұрақтандыру үшін үкімет аймаққа әскер бөлімдерін жіберді. Израиль жағдайға араласып, Сирия үкіметінің позицияларына әуеден соққы беріп, друздардың қырғынын болдыртпадық деп мәлімдеді. Алайда Сирия үкіметі бұл әрекеттерді елдің ішкі ісіне араласу деп бағалады.
Ресми атысты тоқтатуға қарамастан, Сувейда провинциясында іс жүзінде атысты тоқтату тұрақсыз, қауіпті қақтығыстар мен шиеленіс әлі де жалғасып жатыр. Үкімет тәртіпті қалпына келтіру және жағдайды бақылауда ұстау үшін провинцияның солтүстік және батыс бөліктеріне тараған ішкі қауіпсіздік күштерін орналастырды.
Күрд аймақтары
Елдің солтүстік және солтүстік-шығыс провинциялары Ракка мен Хасакеде сайлау комиссиясы қауіпсіздік мәселелерінің әлі де бар екеніне назар аударып, дауыс беруді «қолайлы жағдай мен қауіпсіз орта жасалғанша» кейінге қалдыру туралы шешім қабылдады.
Бүгінде Ракка мен Хасаке провинцияларының бір бөлігі күрд жасақтары маңызды рөл атқаратын Сирия демократиялық күштерінің бақылауында.
Ал Күрд автономиясы әкімшілігінің өкілдері сайлау комиссиясының шешімін «демократияға қайшы» деп айыптап, аймақтардың салыстырмалы түрде тұрақтылығы сақталып, дауыс беруге мүмкіндік беріп отырғанын айтты.
Мәлімдемеде қауіпсіздік мәселелері басқа аймақтармен салыстырғанда қауіпсіз деп саналатындықтан провинцияларды алып тастауға негізді себеп болуы мүмкін дегенді жоққа шығарады.
Асадтан кейінгі алғашқы сайлау
Алдағы парламент сайлауы – Ахмед аш-Шараа өткен жылдың желтоқсанында билікке келгеннен кейінгі бірінші сайлау. Жаңа президент ескі парламентті таратып, уақытша конституция бекітіп, бес жылға өтпелі кезең ашты.
210 депутаттан тұратын ҚХА үшін дауыс беру қыркүйектің 15-20-на жоспарланған. Президент Ахмед аш-Шараа құрамның үштен бірін құрайтын 70 мүшені тікелей тағайындауға құқылы. Қалған 140 орын тағайындалған жергілікті органдар арқылы таңдалады.
Сайлау комиссиясының басшысы Мұхаммад Таха әл-Ахмад уақытша сайлау заңы шыққаннан кейін шағын комиссия құру шамамен бір аптаға созылатынын, сайлау органдарын анықтау үшін тағы 15 күн қажет екенін түсіндірді. Одан кейін кандидаттарды ұсынуға үш күн бөлініп, апта ішінде сайлауалды үгіт-насихат жұмыстары мен кандидаттар арасында пікірсайыс өтеді.
Бұған дейін Сирияда Башар Асад кеткеннен кейін алғаш рет парламент сайлауы өтетінін жазған болатынбыз.