«СК-Фармация» 2016 жылға арналған дәрі-дәрмектердің жеткізілімін аяқтады

АСТАНА. ҚазАқпарат - Қазақстанның бірыңғай дистрибьютері - «СК-Фармация» ағымдағы жылға арналған тегін медициналық көмектің кепілдендірілген көлемі аясында республиканың денсаулық сақтау ұйымдарына дәрілік құралдарды және медициналық мақсаттағы бұйымдарды жеткізуді мерзімінен бұрын 100 пайызға аяқтап отыр, деп хабарлайды ҚазАқпарат.

«Жалпы 2016 жылы «СК-Фармация» ЖШС еліміздің 1115 медициналық ұйымына 114 млрд. теңгенің дәрілік құралдары мен медициналық мақсаттағы бұйымдардың 958 атаулы бірлігін жеткізді», - деп жазады ҚР Денсаулық сақтау және әлеуметтік даму министрлігі.

Оның ішінде ұзақмерзімді келісімшарттар бойынша, отандық өндірушілерден 25,2 млрд. теңгеге дәрілік заттар сатып алынған. Қазақстанда баламасы жоқ, шетелден жеткізілген дәрі-дәрмектерге жалпы 16,7 млрд. теңге жұмсалған.  Тендер арқылы 71,9 млрд. теңге болатын дәрілік заттар сатып алынды.

Сонымен қатар үнемделген бюджеттік қаражат көлемі  5,4 млрд. теңге көлемінде тіркеліп отыр. Бірыңғай дистрибьютер жұмыс істеп жатқан 7 жылда бюджеттің 41,9 млрд. теңге қаржысы үнемделген. Алғаш рет биыл «СК-Фармация» 2017 жылға арналған тендерді мерзімінен бұрын, алдын ала өткізіп отыр. Жеткізушілермен 90 пайыз өнімге қатысты келісімшарт жасалды. 2017 жылға арналған дәрілік заттардың алғашқы жеткізілімін компания биыл желтоқсан айынан бастауға дайын.

Еске салайық, бұның алдында, ҚР Премьер-Министрі Бақытжан Сағынтаев 8 қарашада өткен Үкімет отырысында «СК-Фармация» компаниясының жұмысын сынға алған болатын.

«Барлық жұмысты қайта ұйымдастыру қажет - олар үздіксіз, қателіксіз жұмыс жасауы керек, дәрілер әрбір науқасқа уақытылы жетіп отыруы керек. Мемлекет тарапынан тиісті қаражат бөлініп жатыр. Біз отандық бизнеске заманауи фармзауыттарды салуға жағдайлар жасадық. Қазір шетел нарықтарына да шығып жатырмыз, дәрілеріміз GMP стандарттарына сәйкес келеді. Бізде барлығы бар деуге болады, дегенмен шетелдік дәрілік заттармен проблема шығып жатыр», - деп атап өтті Премьер-Министр.