СҚО-да 84 адам шошқа тұмауын, төрт адам гонконг тұмауын жұқтырған

ПЕТРОПАВЛ. KAZINFORM – Солтүстік Қазақстан облысында эпидемиялық маусым басталғалы 100 адамға тұмау диагнозы қойылды.

СҚО санитариялық-эпидемиологиялық бақылау департаменті басшысының міндетін атқарушы Арман Күшбасовтың айтуынша, А типті тұмауды жұқтырғандар саны басым. H1N1-pdm-09 (шошқа тұмауын) 84 адам, маусымдық H1N1 – 3 адам және H3N2 (гонконг тұмауын) 4 адам жұқтырған.

- А типті тұмау әдетте ауыр өтеді. Биылғы маусымда онымен ауырудың 91 жағдайы тіркелді. В үлгідегі тұмауды 9 адам жұқтырған. Жалпы сырқаттардың 35-і – 14 жасқа дейінгі бала болса, төртеуі – жүкті әйел. Науқастардың ешқайсы тұмауға қарсы екпе алмаған, - дейді Арман Күшбасов.

Ал осы эпидемиялық маусымның басынан өңірде жіті респираторлық-вирустық инфекцияның 75 122 жағдайы тіркелді, өткен жылдың сәйкес кезеңімен салыстырғанда бұл 24% төмен, былтыр эпидемиялық маусымда 93016 адам дәрігерге қаралған. Жұқтырғандардың 67% - 14 жасқа дейінгі балалар.

- Соңғы аптада ЖРВИ-мен 1170 адам ауырды. Сырқаттанғандар саны өсіп отыр. Өткен аптамен салыстырғанда 5% көп. ЖРВИ мен тұмау ауруының негізгі белгілері: жоғары температура, жалпы интоксикация, әлсіздік, тамақ ауруы, мұрын бітелуі.

Алғашқы белгілері байқалған кезде өзін-өзі емдеуге болмайды, дереу медициналық көмекке жүгіну қажет, дәрігерді үйге шақыру керек, ауруды таратпау үшін науқас баланы балабақшаға немесе мектепке жібермеу керек. Дұрыс емделмеген жағдайда асқынып, ең көп таралғаны және қауіптісі – өкпенің қабынуына әкелуі мүмкін, - дейді Арман Күшбасов.

Бұған дейін СҚО-да екі ай ішінде 160-қа жуық адам жануарлардан зардап шеккенін жазған едік.