СҚО-да ата-аналарға мектеп формасына қойылатын талаптар еске салынды

ПЕТРОПАВЛ. KAZINFORM – Солтүстік Қазақстан облысында жаңа оқу жылы қарсаңында ата-аналарға мектеп формасы болу міндетті екені ескертілді.

СҚО білім басқармасы басшысының орынбасары Татьяна Протопопованың айтуынша, мектеп формасы елімізде министрліктің бұйрығымен 2016 жылдан бар. 

- Мектеп формасы оқушылардың жас ерекшеліктеріне сай енгізілген және күнделікті, мерекелік және спорттық деп бөлінеді.

Ер балаларға арналған мектеп формасына пиджак, жилет, шалбар, ақ жейде, күнделікті жейде, сондай-ақ трикотаждан тігілген кофта/түймелі немесе сыдырмалы кардиган, поло жейде немесе тенниска (қыс мезгілінде – трикотаж жилет, водолазка) кіреді. Ер балалардың шалбары кең пішімді болып, ұзындығы аяқтың тобығын жабуы тиіс.

Қыз балаларға арналған мектеп формасына пиджак, жилет, белдемше, шалбар, классикалық блузка, сондай-ақ трикотаж кофта/түймелі немесе сыдырмалы кардиган, поло жейде немесе тенниска (қыс мезгілінде – трикотаж жилет, сарафан, водолазка) кіреді. Қыз балалардың шалбары да кең пішімді болып, ұзындығы аяқтың тобығын жабады, - дейді Татьяна Протопопова. 

Маманның айтуынша, мектеп формасына әртүрлі діни конфессияларға тиесілі киім элементтерін қосуға жол берілмейді. 

- Ата-аналар немесе баланың өзге де заңды өкілдері мектеп формасын тігетін кәсіпорынды немесе оқушы киімін сататын сауда желісін өз бетінше таңдап, сатып ала алады. Сондай-ақ, оқушының мектеп формасын киіп жүруін қамтамасыз етеді, - дейді Татьяна Протопопова. 

Бұған дейін ел өңірлерінде мектеп формасы қаншадан сатылып жатқанын жазған едік.