СҚО-да интернет алаяқтыққа қатысты ұялы байланыс операторы айыппұл төледі

ПЕТРОПАВЛ. KAZINFORM – Солтүстік Қазақстан облысында Қазақстанда тіркелмеген абонеттік нөмірге қызмет көрсеткен ұялы байланыс операторы жазаланды.

СҚО прокуратурасы басқармасының аға прокуроры Асхат Жұмабековтың айтуынша, талдау барысында интернет алаяқтықтың көп жағдайда ұялы байланыс операторының ешқайда тіркелмеген абоненттік нөмір арқылы қашықтан жасалатындығы анықталған. Бұл ҚР «Байланыс туралы» заңына қайшы.

- Қылмыстық істі тергеу барысында алаяқтардың Қазақстанның нөмірлеу жүйесі тәртібіне сәйкес тіркелмеген абоненттік нөмір арқылы қоңырау шалғаны және осылайша СҚО тұрғынына тиесілі ақшаны ұрлауға ықпал еткені анықталды. Яғни абоненттік нөмір ұялы байланыстың абонеттік құрылғыларын тіркеу идентификациялық кодтарының дерекқорына енгізілмеген. Облыс прокуратурасы ұялы байланыс операторына қатысты ҚР ӘҚБтК 637-бабы 1-бөлігінің 17-тармағы бойынша Әкімшілік құқық бұзушылық туралы хаттама жасады. Осы материалды қарау нәтижелері бойынша ұялы байланыс операторы әкімшілік жауапкершілікке тартылды, - деді Асхат Жұмабеков.

Прокурордың айтуынша, зардап шегушілерді қорғаудың мұндай тәсілі бұрын елімізде қолданылмаған.

- Интернет алаяқтықпен күрестің қосымша механизмі қосылды, бұл ұялы байланыс операторларының әрекет етпеуінен зардап шеккендердің материалдық шығынын өтеуге мүмкіндік береді. Жауапқа тартылған ұялы байланыс операторына 100 АЕК мөлшерінде 400 мың теңге шамасында айыппұл салынды. Ол айыппұлдың жартысын қысқартылған іс жүргізу тәртібімен төледі, - дейді Асхат Жұмабеков.

Бұған дейін Алматы қаласының прокуратурасы алаяқтарға аударылған ақшаны қалай қайтарып алуға болатындығын айтқан еді.