СҚО-да қоқыс үйінділерін жоймаған ауылдық округтердің 9 әкімі жазаланды

ПЕТРОПАВЛ. KAZINFORM – Солтүстік Қазақстан облысында былтыр рұқсат етілмеген 116 қоқыс орны анықталды.

СҚО әкімдігінде «Таза Қазақстан» бағдарламасының орындалу барысы пысықталды.

СҚО экология департаментінің мәліметінше, анықталған заңсыз қоқыс орындары бойынша аудандық және қалалық әкімдіктерге тиісті хат жолданған. Алайда заңсыз полигондардың 91% ғана жойылды. Шара қолданбаған 9 ауылдық округ әкіміне 221 мың теңгеден астам айыппұл салынды.

Қазіргі уақытта Қызылжар ауданы Бәйтерек ауылы маңындағы қоқыс полигонына қатысты мәселе бар. Осыдан төрт жыл бұрын департамент Бескөл ауылдық округ әкімі аппаратына қатысты жоспардан тыс тексеріс жүргізіп, 8 га аумақта рұқсатсыз қоқыс полигонының жайылып жатқанын анықтады. Нәтижесінде Бескөл ауылдық округ әкіміне 87,5 мың теңге айыппұл салынып, олқылықты жоюға ұйғарым берілді.

СҚО мамандандырылған ауданаралық экономикалық соты ауыл әкіміне қоршаған ортаны қалпына келтіріп, екі ай ішінде қоқыс орнын жоюға шешім шығарды. Алайда, нәтиже жоқ. Сот бұл жолы осы жылдың 1 маусымына дейін полигонды жоюға уақыт берді.

Мамандардың айтуынша, Бәйтерек ауылының маңындағы рұқсатсыз пайда болған қоқыс орны Петропавл қаласы әуежайының 13 км аумағында орналасқан.

«ҚР әуе кеңістігін пайдалану және авиация қызметі туралы» Заңның 90-бабының 4-тармағына сәйкес әуежайға 13 шақырымға дейінгі аумақта қоқыс полигондарын орналастыруға тыйым салынады. Өйткені қоқыс орны құстардың жаппай жиналуына әкеліп, ұшақтардың ұшуына қатер төндіруі мүмкін.

Бұған дейін СҚО-дағы 450 қоқыс полигонының тек 11-інде ғана құжат бар екендігін жаздық.