СҚО-да скринингіден өткен әр үшінші адамнан туберкулез инфекциясы анықталды
ПЕТРОПАВЛ. KAZINFORM – Солтүстік Қазақстан облысында туберкулез инфекциясын ерте кезеңде анықтау мақсатында жоғары сезімталдыққа ие диагностикалық әдістер – диаскинтест пен квантиферонды тест қолданылып жатыр.
СҚО фтизиопульмонология орталығының мәліметінше, туберкулез инфекциясында ағзада туберкулез микобактериясы болғанымен, аурудың белсенді түріне тән клиникалық немесе рентгенологиялық белгілері болмайды.
Диаскинтест пен квантиферонды тест аурудың белгілері болмай тұрып, ең ерте кезеңінде анықтауға мүмкіндік береді. Бұл ауру асқынбай тұрып, профилактикалық емдеуді бастауға жағдай жасайды.
Сондай-ақ белсенді туберкулезге айналу қаупі жоғары нағыз туберкулез инфекциясын БЦЖ екпесіне байланысты организмнің оң нәтиже беру (Манту оң нәтиже беруі мүмкін, бірақ бұл адам жұқтырды дегенді білдірмейді) реакциясынан ажыратуға мүмкіндік береді. Яғни бұл тесттер бұрыннан қолданылып келген Манту сынамасына қарағанда дәлірек, өйткені олар БЦЖ вакцинасына емес, тек нақты туберкулез бактерияларына ғана әсер етеді.
Әдетте қауіп тобындағы адамдар және науқаспен байланыста болғандар тексеріледі. Атап айтқанда: иммуносупрессивті терапия қабылдап жүргендерге, диализде жүрген немесе ағза трансплантациясына дайындалып жүрген науқастарға, силикоз дертімен ауыратындарға, несеп-жыныс жүйесінің онкологиялық ауруларында қуықішілік БЦЖ терапиясы алдында, қант диабетімен, бронхоөкпелік аурулармен, салмақ жетіспеушілігімен, ВИЧ-инфекциямен, мүгедектікпен тіркелген балаларға, ата-анасы ВИЧ-пен өмір сүретін, қылмыстық-атқару жүйесінде отырған, қолайсыз әлеуметтік жағдайдағы, нашақорлық немесе ішімдікке тәуелді, табысы төмен отбасынан шыққан, сондай-ақ мигрант балаларға, 2 айдан асқан, бірақ БЦЖ вакцинасы салынбаған немесе екпе тыртығы қалыптаспаған балаларға тест жүргізіледі.
2025 жылдың сегіз айында туберкулез инфекциясына қарсы скрининг аясында 476 квантиферонды тест алынып, олардың 168-і оң нәтиже көрсетті. Қауіп тобындағы 734 адамның 84,5%-ы, яғни 623 адамға диаскинтест жүргізілді. Нәтижесінде 41 адамнан туберкулез инфекциясы анықталды. Сонымен қатар жыл басынан бері науқаспен байланыста болған 713 адам тіркеліп, олардың 270-інен туберкулез инфекциясы табылды.
Мамандардың айтуынша, туберкулез инфекциясы анықталған, бірақ белсенді туберкулезі жоқ адамдарға химиопрофилактикалық ем тағайындалады. Бұл – инфекцияның белсенді түрге айналмауы үшін керек.
Бұған дейін СҚО-да жарты жылда 900-ден астам адамға онкология диагнозы қойылғанын жазған едік.