СҚО-да тағы бір ауыл ішімдіктен бас тартты
ПЕТРОПАВЛ. KAZINFORM - Солтүстік Қазақстан облысында спирттік ішімдіктен толық бас тартқан ауылдардың саны 13-ке жетті.
Бұл тізімде енді М.Жұмабаев ауданындағы Сулышоқ елді мекені де бар. Петропавлдан 115 км қашық жатқан ауылда, полицияның мәліметінше, соңғы жылдары мас күйінде жасалған бірде-бір құқықбұзушылық тіркелмеген.
Сулышоқ ауылында 217 адам тұрады, 45 үй бар. Елді мекенде балабақша мен негізгі орта мектеп жұмыс істейді.
Ауыл тұрғындарының негізгі бөлігі осындағы «Агро-Комплекс-Сулышок» ЖШС еңбек етеді. Шаруашылықты ауыл тумасы, кәсіпкер Қайрат Жәнібеков басқарады. Успен ауылдық округінің әкімі Сарагүл Бейсебаеваның айтуынша, мұнда тәртіп пен еңбекқорлық бірінші орында. Оның көшелердің тазалығынан, халықтың көңіл күйінен-ақ байқауға болады.
СҚО полиция департаментінің мәліметінше, 2021 жылдан бастап облыста ішімдік тұтынудан толық бас тартқан елді мекендер саны артып келеді. Бүгінде мұндай 13 ауыл бар және олардың ешқайсысында соңғы 5 жылда қылмыс тіркелмеген.
Бұған дейін Павлодар облысында 16 ауыл ішімдіктен бас тартқанын жазған едік.