СҚО-да жарма өнімдерін шығаратын заманауи кәсіпорын салынып жатыр
ПЕТРОПАВЛ. KAZINFORM – Солтүстік Қазақстан облысында жарма және түрлі дән өнімдерін өндіретін жоғары технологиялық зауыт құрылысы жүріп жатыр.
ҚР Ауыл шаруашылығы министрлігінің мәліметінше, жобаны «Қазақстан Бидайы» ЖШС жүзеге асырады. Жалпы құны 3 млрд теңгеден асады. Қажетті инфрақұрылымды тарту үшін облыстық бюджеттен 291 млн теңге бөлінген.
Кәсіпорын құрылысы былтыр мамыр айында басталды. Зауытта астықты өңдеудің толық өндірістік циклі енгізіліп, құны жоғары өнім шығарылады. Бұл қазақстандық агроөнеркәсіптік өнімдердің ішкі және сыртқы нарықтардағы бәсекеге қабілеттілігін айтарлықтай арттыруға мүмкіндік бермек.
Кәсіпорында тоғыз түрлі өнім, соның ішінде әртүрлі ботқа шығару жоспарланып отыр. Зауыттың жылына 24-тен 30 мың тоннаға дейін дайын өнім шығармақ.
Нысанда қазір Украинадан жеткізілген заманауи жабдық орнатылып жатыр. Үш өндірістік желіні іске қосу көзделген. Өндірістің энергия тиімділігі мен экологиялық қауіпсіздігіне ерекше назар аударылады. Барлық технологиялар халықаралық сапа стандарттарына сай болады.
Зауытты осы жылдың тамыз–қыркүйек айларында іске қосу жоспарланған.
Бұған дейін агроөнеркәсіп кешенінде құны 3,3 трлн теңге болатын 677 жоба іске асырылатынын жазған едік.
Қазақстан ұнын Таяу Шығыс пен Африка елдеріне шығару мәселесі пысықталып жатыр.