Нәтижесінде бизнес өкілдерінің 180 млн теңгеден астам мүліктік құқығы қорғалды. Кәсіпкерлер ең көп мемлекеттік сатып алу, салық және бухгалтерлік есеп, сондай-ақ субсидия мәселелері бойынша көмек сұраған. Бұл туралы Кәсіпкерлер палатасының өкілдері Кәсіпкерлердің құқықтары мен заңды мүдделерін қорғау бойынша 9 айдағы жұмыс қорытындысын жариялаған жиында мәлімдеді.
Кәсіпкерлер палатасына көбіне диқандар мәселелерімен жүгінген. Бұл барлық өтініштің — 33%. Одан кейін жұмыс және қызмет көрсету саласы — 22%, сауда және сыртқы экономикалық қызмет — 15%. Қалған 30% басқа бағыттарға тиесілі.
Кәсіпкерлер ең көп мемлекеттік сатып алу, салық және бухгалтерлік есеп, сондай-ақ субсидия мәселелері бойынша көмек сұраған.
Кәсіпкерлердің құқықтарын қорғауда прокуратура мен Экономикалық тергеу департаментінің көмегі көп. Осындай бірлескен қабылдаулар мен түсіндіру кездесулерінің нәтижесінде кәсіпкерлердің 7 мәселесі оң шешімін тапқан.
Кәсіпкерлер мен Палата өкілдері өңірдегі 48 консультативтік-кеңесші органның жұмысына қатысады. Жыл басынан бері олардың 179 отырысында кәсіпкерлікке қатысты 292 мәселе қаралған.
Қазіргі таңда жергілікті кәсіпкерлер көтерген 73 мәселе республикалық деңгейдегі проблемалар тізіліміне енгізілген. Оның 14-і биыл ұсынылған. Бұл мәселелерді шешу үшін жалпыұлттық заңнама мен заңға тәуелді актілерге өзгерістер енгізу қажет.
Бұған дейін СҚО кәсіпкерлері өндірісті дамытуға кедергі болып тұрған мәселелерді атағанын жазған едік.