Солтүстік Қазақстан облысының прокурорлары заңсыз контенті бар топтарды бұғаттады. Қадағалау органы әлеуметтік желілер мониторингі шеңберінде экстремистік, террористік сипаттағы ақпарат, жасөспірімдердің суицидін насихаттау және балаларға қатысты зорлық-зомбылық әрекеттері таратылған топтарды анықтады.
— Мысалы, «POZOR PETRO» Telegram-арнасында кәмелетке толмағандардың ар-намысы мен қадір-қасиетіне нұқсан келтіретін посттар, сондай-ақ сексуалдық сипаттағы бейнероликтер орналастырылды. «Кибернадзор» ақпараттық жүйесі арқылы қабылданған шаралармен аталған топтарға кіру бұғатталған. Жыл басынан бері облыс прокуратурасы заңсыз контенті бар 205 интернет-ресурсты бұғаттады, — делінген ведомство хабарламасында.
Солтүстік Қазақстан облысының прокуратурасы ата-аналарды кәмелетке толмағандардың ақпараттық қауіпсіздігіне ерекше назар аударуға, олардың интернет-белсенділігіне қызығушылық танытуға және олар қарап отырған мазмұнды бақылауға шақырады.
Ата-аналардың балаларына уақыт бөліп, интернетті қауіпсіз пайдалану туралы үнемі айтып отыруы, сондай-ақ олардың әлеуметтік желілер мен мессенджерлердегі белсенділігін бақылауы балаларды заңсыз әрекеттер мен зиянды контенттен қорғауға көмектеседі.
Бұған дейін Алматы облысында интернет-алаяқтыққа қатысты 518 жалған хабарландыру бұғатталғаны айтылды.