Петропавл тұрғыны Юрий Адарич бірер күннен бері үйіне көмір түсіріп ала алмай әлек. Оған қыстап шығу үшін 5-6 тонна қатты отын қажет. Теміржол тұйығына келіп, Шұбаркөл көмірін таппаған ол бұл жолы да бос қайтты.
«Былтырғы мәселе қайталанбаса екен. Қыста тағы да көмірсіз қалмасақ екен деп тілеймін. Биыл ерте қамданбақ болып едім, бірақ әкелініп жатқан көмірдің көлемі аз, талап әкетіп жатыр», - дейді қала тұрғыны.
СҚО энергетика және тұрғын үй-коммуналдық шаруашылығы басқармасының мәліметінше, өңір жылыту маусымында 419 тонна көмір пайдаланады, әзірге тұрғындардың 40 % ғана 170 мың тоннаны түсіріп алған.
«Өңірде көмір түсіретін 32 теміржол тұйығы бар. Оның 4-уі Петропавлда орналасқан. Ал қара отынды сатумен 18 кәсіпорын айналысады. Қазір қоймаларда 21 мың тонна көмір жатыр, оның 1350 тоннасы облыс орталығында. Соның 490 тоннасы Қаражыра, 560 тоннасы – Шұбаркөл және 300 тоннасы Екібастұз өнімі. Баға әзірге өскен жоқ. Түріне баланысты 10 мың мен 17,5 мың теңге аралығында сатылып жатыр. Шұбар-көл мен Қаражыра 12-17,5 мың теңге аралығында саудаланса, Екібастұз көмірінің ең қымбаты 12,5 мың теңге тұрады», - дейді басқарманың басшысы Бақыт Ілиясов.
Өңірдегі бюджеттік мекемелерге жылыту маусымына 141 мың тонна көмір қажет. Қазір қазандық арқылы жылтылатын 604 білім, 396 денсаулық сақтау, 167 мәдениет және 4 жұмыспен қамту нысаны бар. Бүгінде олардың 88 % отынмен қамтылды. Қалғандары көмірді жеткізу бойынша кәсіпорындармен келісімшартқа отырды.
«Келісімге байланысты әлеуметтік нысандарға кезең-кезеңмен жеткізіледі. Қыркүйек айының ортасына дейін, яғни жылыту маусымы басталғанға дейін толық қамтылады. Ал тұрғындарға арналған көмір әкелініп жатыр. Қазіргі уақытта Петропавлға 210 тонна Шұбакркөл, 1330 тонна Қаражыра көмірі келе жатыр. Жалпы, көмір өңірге жылыту маусымы аяқталғанша дейін жеткізіледі», - дейді Бақыт Ілиясов.