«Скуадра Адзурраның» ардагерлері Ресей құрамасынан ұтылып қалды

None
  АСТАНА. ҚазАқпарат - Ардагер футболшылар арасында өтіп жатқан «EXPO 2017 Football Cup» турнирінің екінші матчында Ресей командасы Италиядан келген футболшыларды 9:3 есебімен ойсырата жеңді, деп хабарлайды «ҚазАқпарат» ХАА тілшісі.

Италия командасы алғашқы таймда айтарлықтай қарсылық көрсете алмады. Бір кездері Еуропаны дүр сілкіндірген Дино Баджо қатарлы үздіктердің қайраты қайтқан секілді. Көршілес Ресей ардагерлер құрамасының сапына кіл мықтыларын жіберген көрінеді. Матчтың алғашқы 6 минуты өтпей жатып-ақ ресейлік Роман Широков «Скуадра Адзурра» ардагерлер құрамасының қақпасынан жауапсыз 3 голды тоғытып жіберді. Бұдан кейін Сергей Ильяков тағы бір гол салғанымен, футбол жұлдызы Дино Баджо 13 минутта есе қайтары. Алғашқы тайм 1:5 есебімен ресейліктердің пайдасына шешілді.

Екінші таймда ресейліктердің қарқыны бәсеңдеген жоқ. Виктор Булатов дубль жасаса, Евгений Алдонин тағы бір гол салды. Матчтың бел ортасында италиялықтардан Анжела Карбони көзге түскен. 39 минутта Дино Баджоның Италия үшін соққан үшінші голы матчты тәмамдады. Есеп Ресей командасының пайдасында - 9:3.

Еске сала кетсек, «EXPO 2017 Football Cup» турнирінің бірінші матчы Қазақстан мен Германия құрамаларының арасында өткен болатын. Біздің отандастарымыз германиялықтарды 8:6 есебімен тізе бүктірген. Алғашқы матчта қазақстандық футболшы Мұрат Тілешев хет-трик жасады.