Қарулы күштердің Мемлекеттік әскери-тарихи музейінде Мәскеуден Астанаға Қазақстан Қарулы күштерінің әскери бортымен жеткізілген соғыс жылдарында қаза тапқан қазақстандық жауынгерлер Сапарбай Имахаев пен Дәдікбай Құлтасовтың сүйектерін табыстаудың салтанатты рәсімі өтті. Рәсімге Қорғаныс министрлігінің басшылығы, құрмет қарауыл ротасы әскери қызметшілері, қоғам өкілдері, Қарулы күштер ардагерлері және қаза тапқан жауынгерлердің туыстары қатысты.
«Біз бүгін болашақ ұрпақ үшін өздерін құрбан еткен жауынгерлерге құрмет көрсетіп отырмыз. Қазіргі Отан қорғаушылар үшін олар мықты рухтың, көзсіз батырлық пен антқа шын берілгендіктің үлгісі саналады. Олардың ерлігі келер ұрпақтың жадында мәңгі қалады. Іздеу жұмыстарына белсенді қатысып, жастарды әскери-патриоттық тәрбиелеуге зор үлес қосқандарға Қарулы күштер басшылығы атынан зор алғысымды білдіремін», - деді Бас штаб бастығының орынбасары, генерал-майор Асан Жүсіпов.
Қызылорда облысы Терекүзең ауданының тумасы Дәдікбай Құлтасов 1904 жылы туған. Ол Ленинград майданында 136-шы атқыштар дивизиясының құрамында соғысып, 1942 жылдың қыркүйек айының басынан бері хабар-ошарсыз кетті. Оның сүйегін Ленинград облысындағы шайқас орнынан «Суворов» жасағының іздеушілері тапты.
«Әрбір іздеуші үшін ең бастысы – қаза тапқан сарбаздың туыстарын табу. Біз үнемі елімізде тұрғындар, туыстар мен жерлестер арасында жақын байланыс бар деп айтамыз. Бұрындары іздеумен айналысатын өзге елдегі әріптестер бұған таңданыспен қарайтын. Қазір мұндай қарым-қатынастың мықты екеніне көздері әбден жетті», - деді «Atamnyn Amanaty» ҚБ басқарма төрағасының орынбасары Райгүл Мұшанова.