Солтүстік Корея Жапонияға қарай зымыран ұшырды
06:31, 05 Сәуір 2017
АСТАНА. ҚазАқпарат - Солтүстік Корея тағы да орта қашықтықта ұшатын баллистикалық зымыранды ұшырды. Зымыранның ұшырылғанын АҚШ қарулы күштері тынықмұхиттық қолбасшылығы да нақтылап отыр, деп жазады Би-би-си.
Зымыран Корей түбегінің шығыс жағалауынан Жапонияға қарай бағытталған.
Америкалық әскерилердің мәліметі бойынша, зымыран Жапон теңізінің бейтарап аймағына құлаған.
Оңтүстік Кореяның Қорғаныс министрлігі таратқан ақпарат бойынша, зымыран 9 минут бойы ұшқан. Осы уақыт аралығында ол 60 км қашықтықты жүріп өткен.
Солтүстік Кореяның бұл жолғы зымыран сынағы ҚХР Төрағасы Си Цзиньпиннің АҚШ-қа баруына 1 күн қалғанда жасалып отыр.
Қытай көшбасшысының Дональд Трамппен арадағы талқылайтын мәселелерінің бірі осы Пхеньянның зымыран-ядролық әлеуетін ауыздықтау болып табылады.