АСТАНА. KAZINFORM — Қазақстандық теннисші, 19 жастағы Соня Жиенбаева жұптық сында Элвас (Португалия) ITF W50 турнирін жеңіспен бастады.
Қазақстандық спортшы литвалық Ивета Дапкутемен бірге алғашқы айналымда португалиялық Мария Гарсия — америкалық Ди Джей Беннетке қарсы келді.
Бірінші партияда португалиялық-америкалық дуэт 6:3 есебімен басымдылық танытты. Дегенмен бұдан кейін С. Жиенбаева — И.Дапкуте ойын тізгінін қолына алып, камбэк жасай білді — 6:2, 10:6.
Бәсеке сағат жарымға жуық уақытқа созылды.
Соня Жиенбаева — Ивета Дапкуте жартылай финалға шығу үшін жарыстың 3-ракеткалары, словакиялық Катарина Кузмова — нидерландылық Стефани Джудит Виссхермен таласады.
Биыл сәуірде Билли Джин Кинг кубогы аясында Канадамен іріктеу матчында Қазақстан құрамасы сапында алғашқы ойынын өткізген С. Жиенбаева жекелей сында WTA рейтингісінде 755-орында тұр. Ал жұптық сында кеше жаңартылған рейтингіде 700-ден бірден 606-сатыға көтерілді.
Еске сала кетейік, бұдан бұрын Уимблдон турнирінің қазақстандық теннисшілер үшін сәтсіз басталғанын жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).