Сот Greenpeace ұйымын құбыр тасымалдау компаниясына 660 млн доллардан астам өтемақы төлеуге міндеттеді

АСТАНА. KAZINFORM —  Экологиялық ұйымның мәлімдеуінше, оның наразылық қозғалысына қатысуына байланысты сот ісі АҚШ-тағы қызметінің тоқтауына әкелуі мүмкін, деп хабарлайды The New York Times.

Солтүстік Дакотаның Мортон округінің алқабилер соты Техастың «Energy Transfer» құбыр тасымалдау компаниясына 660 миллион доллардан астам өтемақы төлеу туралы шешім шығарды. Компания Greenpeace-ті «Dakota Access» құбырына қарсы өткен наразылықтардағы рөлі үшін сотқа берген. Бұл наразылықтар шамамен он жыл бұрын өткен еді.

Бұл шешім экологиялық ұйым үшін ауыр соққы болды. Greenpeace мәлімдемесінде, «Energy Transfer» талап етіп отырған өтемақы ұйымның АҚШ-тағы қызметін тоқтатуға әкелуі мүмкін екенін айтты.

Greenpeace апелляцияға беретінін мәлімдеді, себебі ұйым бұл наразылықтарға шамалы деңгейде қатысқанын және олардың негізгі ұйымдастырушысы Солтүстік және Оңтүстік Дакота аумағында орналасқан «Standing Rock Sioux» үндістерінің тайпасы болғанын алға тартты.

Іс бойынша Greenpeace-тің үш ұйымы: «Greenpeace Inc.», «Greenpeace Fund» және «Greenpeace International» айыпталды. Оларды құбыр құрылысының кешігуіне, шығындардың өсуіне және «Energy Transfer» беделіне нұқсан келтіруге себеп болған наразылықтарды қаржыландырды деп айыптады.

«Energy Transfer» — АҚШ-тағы ең ірі құбыр тасымалдау компанияларының бірі. 2016 және 2017 жылдары «Dakota Access Pipeline» құбырының құрылысына қарсы наразылықтар бүкіл елдің назарын аударды.

Наразылық білдірушілер мен экология қорғаушылары «Standing Rock Sioux» резервациясында жиналып, құбырдың қасиетті жерлер арқылы өтетінін және жергілікті су көздерін ластау қаупі бар екенін мәлімдеді. Үндістер тайпасы жобаны тоқтату үшін сотқа жүгінген болатын.

Бұған дейін Greenpeace Нидерландқа қарсы сотта жеңіске жеткені хабарланған еді.