Сот қаулысын ішімдік ішіп бұзған атыраулық 20 тәулікке қамалды

АТЫРАУ. KAZINFORM – Атырау қаласының тұрғыны наурыз айында сот қаулысымен алкогольдік ішімдік ішуге тыйым салу жөніндегі ерекше талапты бұзған. Сот қаулысымен ер адам 20 тәулікке әкімшілік қамауға алынды. 

Атырау қаласының әкімшілік құқық бұзушылықтар жөніндегі мамандандырылған сотында ҚР Әкімшілік құқық бұзушылық туралы кодексінің 669-бабының 3-бөлігі бойынша әкімшілік құқық бұзушылық туралы іс қаралды. 

– Атырау қаласының тұрғыны И.-ға сот қаулысымен 1 жыл мерзімге алкогольдік ішімдіктерді тұтынуға тыйым салу түріндегі ерекше талаптар белгіленген. Алайда 2025 жылдың наурыз айында тұрғылықты мекен-жайын тексеру кезінде И.-дың алкогольдік ішімдік ішкен күйде болғаны анықталған. Осылайша ол соттың қаулысын бұзған, - деп хабарлады аталған соттан. 

И.-дың кінәсі әкімшілік құқық бұзушылық туралы және сауалнама хаттамаларымен, сот қаулысымен және басқа да іс материалдарымен расталды.

– Сот қаулысымен И. әкімшілік құқық бұзушылық жасағаны үшін кінәлі деп танылды. Оған 20 тәулікке әкімшілік қамаққа алу түріндегі жаза қолданылды, - деп мәлім етті соттан.

Сот қаулысы заңды күшіне енді. 

Еске сала кетелік, бұған дейін Атырауда жыл басынан бері 100 мыңға жуық құқық бұзушылық анықталғанын жазған едік.