ОРАЛ. ҚазАқпарат - Бөрлі аудандық сотының шешімімен бұрын Ақсай қаласының тұрғыны С-ға тиесілі болған пәтер иесіз қалған мүлік деп танылып, коммуналдық меншікке берілді.
БҚО сотының баспасөз қызметінен түскен мәліметке қарағанда, 91 жасқа қараған шағында 2007 жылдың мамыр айында қайтыс болған марқұмның артында Ақсай қаласында жекешендірілген пәтері қалған. Аталған жылжымайтын мүлікті ешкім өсиет бойынша да, заң бойынша да мұраға қабылдамаған.
Қазақстан Республикасы Азаматтық кодексінің 1083-бабына сәйкес, егер өсиет бойынша да, заң бойынша да мұрагерлер болмаса не мұрагерлердiң ешқайсысының мұра алуға құқығы болмаса, не олардың бірі мұрадан бас тартса, мұра иесiз қалған мүлік деп танылады. Сөйтіп, аталған пәтерді иесiз қалған мүлік деп тану туралы сотқа жүгінген Бөрлі ауданы әкімінің талапарызы қанағаттандырылды.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).