SpaceX зымыран ұшыру бойынша Пентагонның ең ірі мердігеріне айналды
АСТАНА.KAZINFORM - АҚШ Қорғаныс министрлігі 2030-жылдардың басына дейін ұлттық қауіпсіздік мүддесі үшін ұшырылымдарды жүзеге асыру үшін SpaceX, United Launch Alliance (ULA) және Blue Origin сияқты үш жеке компаниямен жалпы сомасы 13,7 миллиард доллар болатын келісімшартқа қол қойды. Бұл туралы АҚШ ғарыш күштері хабарлады.
Келісімшарттар Құрама Штаттардың ғарышқа кепілдік берілген қолжетімділігін қамтамасыз етуге бағытталған Ұлттық қауіпсіздік ғарыштық ұшыру (NSSL Phase 3 Lane 2) бағдарламасы бойынша беріледі. Пентагонның маңызды активтерін орбитаға жеткізуге бағытталған келісімдер шамамен 54 миссияны қамтиды. Миссиялар 2027 және 2032 жылдар аралығында іске қосылады деп жоспарланған.
— Сенімді және тұрақты ғарыштық ұшыру архитектурасы біздің экономикалық өркендеуіміздің де, ұлттық қауіпсіздігіміздің де негізі. «Ұлттық қауіпсіздік ғарыштық ұшыру – жай ғана бағдарлама емес, бұл біздің жауынгерлеріміз соғысып, жеңіске жету үшін қажет ғарыш мүмкіндіктерін беретін стратегиялық міндет», - деді АҚШ ғарыш күштері ғарыш операцияларының бастығы генерал Ченс Зальцман.
SpaceX келісім-шарттардың ең үлкен бөлігін, құны 5,9 миллиард доллар болатын 28 миссияны жеңіп алды, бұл АҚШ армиясының спутниктерді ұшыру және басқа да стратегиялық миссиялар бойынша негізгі мердігері ретіндегі позициясын одан әрі нығайтты.
Boeing және Lockheed Martin бірлескен кәсіпорны саналатын United Launch Alliance компаниясының да айтарлықтай үлесі бар, оның 19 миссиясы 5,3 миллиард долларды құрайды. Компания наурыз айында сертификатталған жаңа Vulcan зымыранымен жұмыс істейді.
Алғаш рет Джефф Безостың Blue Origin NSSL бағдарламасына қосылды. Бұл компания үшін маңызды кезең: қаңтар айында бір рет ұшырылған және пайдалану тәжірибесі аз болған оның New Glenn зымыранына құны 2,3 миллиард доллар болатын жеті миссиялық келісімшарт берілді.
Жаңа кезеңде SpaceX, ULA және Blue Origin стандартты және күрделі миссияларды орындайды.
SpaceX ғарыш кемесі алғаш рет Жердің полярлық аймақтарының үстінен ұшатыны бұған дейін хабарланған болатын.