АСТАНА. KAZINFORM — Оңтүстік Кореяның Чечхон қаласында спорттық гимнастикадан өтіп жатқан Азия чемпионатында Қазақстан қоржынына алғашқы медаль түсті.
Қазақстан гимнастика федерациясының баспасөз қызметінен мәлім еткеніндей, еліміздің ерлер құрамасы қола жүлдеге қол жеткізді.
Қазақстандық гимнастар командалық көпсайыста үздік үштікке ілікті.
Ел намысын Нариман Құрбанов, Милад Карими, Дмитрий Патанин, Роман Маменов, Ілияс Әзізов және Әлішер Тойбазаров қорғады. Олар 240.301 ұпай жинады.
Жапония құрамасы 253.002 ұпаймен чемпион атанды. Ал екінші орынға Қытай құрамасы (248.265 ұпай) көтерілді.
Спорттық гимнастикадан Азия чемпионаты 8 маусымда мәресіне жетпек.
Еске сала кетейік, бұдан бұрын спорттық гимнастикадан Азия чемпионатында Қазақстаннан кімдер өнер көрсететінін жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).