Степногор қаласының маңында шахталардан заңсыз алтын өндіріп жүрген қылмыстық топтың әрекеті әшкереленді
Бұл туралы облыстық прокуратураның баспасөз қызметінен хабарлады.
Прокуратураның мәліметі бойынша, Степногор қаласына қарасты Ақсу кентінің тұрғыны қала маңындағы шахталардан құрамында алтыны бар руданы заңсыз өндіру мақсатында 6 адамнан тұратын қылмыстық топты құрған. Аталған топ 2013 жылдың наурызынан бастап 2015 жылдың ақпан айы аралығында жабық жатқан шахталардан құрамында алтыны бар руданы заңсыз өндіріп, одан алынған өнімді- алтын, күмісті жасырын саудалап, түскен табысты өзара бөлісіп отырған. Сондай-ақ, жер астында қазба жұмыстарымен айналысатын тәжірибесі бар өзге адамдарды да топ құрамына тартып, оларды жабылған шахталарға түсіріп отырған. Ол үшін жарылғыш заттарды сатып алып, шикі руданы өңдейтін цех ұйымдастырған. Осылайша, қылмыстық топ ұзақ уақыт бойы заңсыз оңай олжаға кенеліп отырған.
Кейін қылмыстық топтың жолы кесіліп, үстерінен ҚР ҚК 262 бабының 1 бөлімі, 188 бабы 4 бөлімінің 1,3 тармағы, 214 бабы 2 бөлімінің 1,2 тармағы, 287 бабының 2 бөлімі, 287 бабының 5,24,3 бөлімдері, 188 бабы 4 бөлімінің 1 тармағы және 334 бабының 3 бөлімі бойынша қылмыстық іс қозғалды.
Жақында аталған қылмыстық іс соттың қарауына жолданды.