Степногорде қоқыс жәшігінен табылған ер адамның өліміне қатысты күдікті ұсталды
Полицейлердің мәліметі бойынша, ағымдағы жылдың 26 ақпанында Степногор қаласының тұрғыны өзі тұратын тұрғын үйдің ауласындағы тұрмыстық қалдықтарды тастайтын жәшіктің маңынан ер адамның мүрдесін анықтап, полицияға хабарласқан.
«Оқиға орнына дереу жеткен облыстық ІІД мен Степногор қалалық ІІБ криминалды полиция қызметкерлері жартылай шешінген ер адамның мүрдесінің жанында ешқандай құжаттар мен айғақтардың болмауынан қылмысқа қатысы бар адамдарды анықтау мақсатында үй-үйді аралап, тұрғындардан сұрастырады және сол маңдағы дүкендердегі бейнебақылау камераларындағы жазбаларды тексереді.
Нәтижесінде араға бір сағат салып, 26 жастағы күдікті анықталады. Тергеу амалдары барысында күдікті қылмысын бірден мойындайды. Кейін белгілі болғандай күдікті мен өлген адам сол күні қосылып арақ ішкен. Отырыс барысында екеуара сөзге келіп қалған. Артынша бір-біріне жұдырық ала ұмтылған. Сол кезде күдікті бөтелкелесіне бірнеше жерден пышақ сұғып алған. Кейін қылмысын жасырмақ болған күдікті, мәйітті қоқыс жәшігіне жасырады.
Қазіргі кезде, күдікті уақытша ұстау оқшаулағышына тоғытылып, ҚР ҚК 99 бабының 1 бөлімі бойынша сотқа дейінгі тергеу амалдары жүргізілуде», деп көрсетілген хабарламада.