Стив Баракатт Қазақстан жайында: Ғажап динамикасы бар танымал жер
АСТАНА. KAZINFORM – Есімі әлемге әйгілі композитор әрі пианист Стив Баракатт 8 наурыз - Халықаралық әйелдер мерекесіне орай «Астана Операда» концерт өткізу үшін елімізге алғаш рет келді. Ол Kazinform агенттігінің тілшісіне берген эсклюзивті сұхбатында Қазақстан және оның адамдары жайлы әсерімен бөлісті.
— Қазақстанға алғаш рет табан тірегеніме және «Астана Опера» сынды ғажайып мәдени ордада өнер көрсететініме өте қуаныштымын. Бұл жердің ауа райы Канаданың ауа райына аздап ұқсайды екен. Сол жақта дүниеге келген соң қысқы климатын жақсы білемін. Қазақстан туралы айтар болсам, бұл елдің адамдары ержүрек екенін сезіндім. Жас мемлекет болса да үлкен тарихтарыңыз, салт-дәстүрлеріңіз бар. Астана мен Қазақстан төңірегіндегі динамиканы көрдім және бұл маған ұнайды, - деп атап өтті Стив Баракатт.
Музыкант Қазақстанның жылы қабыл алғанын және ЮНИСЕФ жұмысының маңыздылығын атап өтті.
— 20 жылдан астам уақыттан бері ЮНИСЕФ-тің Канададағы ізгі ниетті елшісі болып жұмыс істеймін. Қазақстанның балаларға көмек көрсетуге, сондай-ақ олардың өмір сүру сапасын жақсартуға өте жіті қарайтынын білемін, - деді ол.
Маэстро қазақстандықтардың жүздері жылы, мінездері жайдары екенін ерекше атап өтті.
— Азияда бірнеше мәрте болдым және бұл еуропалық және азиялық құндылықтардың тамаша үйлесім тапқан мекені. Мен тарихтарыңыздың кеңес одағымен байланысты екенін білемін. Қазақстанда өнердің, музыканың және балеттің барлық сұлулығын көре аласыз. Бұл тамаша жер, - деді Баракатт.
Сондай-ақ музыкант әңгіме арасында қазақтың дәстүрлі музыкасына қызығушылық танытып жүргенін, болашақта жергілікті орындаушылармен тығыз қарым-қатынас орнатып, бірлесе жұмыс істеуді жоспарлап отырғанын да айтып қалды.
— Фольклорлық музыканы жиі тыңдаймын. Әрі сіздерде Димаш Құдайберген сияқты танымал әншілер бар екенін білемін. Алдағы уақытта бұл ел туралы көбірек білгім келеді. Сол себепті болашақта жергілікті музыканттармен ынтымақтастық орнатуды жоспарлап отырмын. Бұл жолы симфониялық оркестрмен өнер көрсетеміз және алдағы бірнеше жылда дәстүрлі музыканы тереңірек зерттеймін, - деді ол.
Стив Баракатттың шыққан тегі ливандық, бірақ Канаданың азаматы. Ол – композитор, пианист, музыкалық продюсер және шығармашылық директор. Отыз жылдан астам уақытты қамтитын өнер жолында көптеген марапатты иеленген.
Концерттік пианист ретінде Стив Баракатт бес құрлықта 500-ден астам жанды қойылып қойып, көрермендерді эмоционалды және күрделі композицияларымен баурап алды. Оның музыкасы жүздеген теледидарлық бағдарлама мен халықаралық спорттық трансляцияларда, оның ішінде футболдан әлем чемпионаты мен Формула-1 гран-приінде ойналды.
Көптеген туындыны жарыққа шығарған музыкант ретінде Стив Баракатт бүкіл әлем бойынша 5 миллионнан астам альбомды сатты. Ал оның музыкалық каталогы YouTube-те 250 миллионнан астам қаралым жинады. Орындаушы және артис ретіндегі жетістігінен басқа, Баракатт әлемдегі ең танымал ресми әнұрандардың композиторы саналады. Оның шығармаларының арасында «Бесік жыры» (ЮНИСЕФ әнұраны) бірлік пен үміттің қуатты үндеуін білдірдіп, бес құрлыққа таралды. Тіпті халықаралық ғарыш станциясы эфирінде трансляцияланды.
Айта кетейік, Стив Баракатт «Астана опера» сахнасында өнер көрсететін бірінші солтүстікамерикалық композитор әрі пианист болмақ.