АСТАНА. KAZINFORM — Қазақстанның екінші, әлемнің 107-ракеткасы Александр Шевченко Стокгольм (Швеция) ATP 250 турнирінің ширек финалына шықты.
Қазақстандық теннисші екінші айналымда әлемнің 18-інші, жарыстың 2-ракеткасы, норвегиялық Каспер Руудқа тап келді.
Осыған дейін қарсыластар өзара үш рет кездесіп, бәрінде норвегиялық спортшы басым түскен еді.
Бұл жолы бірінші партияда Рууд тай-брейкте табандылық танытты – 7:6 (7:5).
Дегенмен бұдан кейін А.Шевченко камбэк жасай білді – 6:4, 6:3.
Екі сағат 20 минутқа созылған тартысты бәсекеде Шевченко 13 эйспен бірге 6 брейк-пойнттың төртеуін пайдаланды. Рууд 10 эйс, 2 брейкпен (4 брейк-пойнт) шектелді.
Александр Шевченко жартылай финалға шығу үшін әлемнің 51-ракеткасы, аргентиналық Тьяго Агустин Тирантемен таласады.
Қазақстандық теннисші қазіргі кезде ATP Live рейтингісінде 99-орынға көтеріліп, ТОП-100-ге қайта кіріп тұр.
Еске сала кетейік, бұдан бұрын Александр Шевченконың Швециядағы турнирде қатарынан үш кездесуде жеңіске жеткенін жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).