АСТАНА. ҚазАқпарат - Болгария астанасы София қаласында өтіп жатқан бокстан халықаралық «Странджа-2023» турнирінде қазақстандық Ертуған Зейнуллинов алғашқы жекпе-жегін өткізді, деп хабарлайды ҚазАқпарат тілшісі.
Халықаралық турнирде 63,5 келіде сынға түскен ол 1/16 финалда испаниялық Конде Ойер Ибарречемен шеберлік байқасты.
Кездесу барысында қазақстандық боксшы жинақы қимыл көрсетті. Нәтижесінде қарсыласынан басым түсіп, жарыстың 1/8 финалына жолдама алды.
Енді ол 22 ақпанда өзбекстандық Мужибулло Турсуновпен қолғап түйістіреді.
Айта кетсек, бұған дейін алғашқы жекпе-жегінде жеңіске жеткен Ерасыл Таңқай (60 келі), Оразбек Асылқұлов (57 келі) жарыстың келесі сатысына шықты.
Еске салсақ, аталған жарыста қазақстандық 13 былғары қолғап шебері ел намысын қорғайды.
Фото: Сали Сабиров, ҰОК баспасөз қызметі
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.