АСТАНА. ҚазАқпарат - Болгария астанасы София қаласында өтіп жатқан халықаралық «Странджа-2023» турнирінде 24 ақпанда ширек финалда қазақстандық Бекзад Нұрдәулетов қарсыласына есе жіберді, деп хабарлайды ҚазАқпарат тілшісі.
Халықаралық турнирде қазақстандық боксшы 80 келі салмақта өзбекстандық Джасурбек Юлдошевпен қолғап түйістірді. Төрешілер шешімімен өзбекстандық жарысты жалғастыруға мүмкіндік алды.
Осылайша Бекзад Нұрдәулетов мамандар арасында кіші әлем чемпионаты ретінде бағаланатын турнирде медальге қол жеткізе алған жоқ.
Ол 2019 жылы әуесқойлар арасындағы әлем чемпионатында алтын медаль алды. Қазір кәсіпқой бокста да сынға түседі. Алты жекпе-жегінің барлығында жеңіске жетті.
Еске салсақ, бұдан бұрын қазақстандық екі боксшы жартылай финалға шықты.
Аталған турнирге ел құрамасынан барлығы 13 боксшы барған еді.
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.