***
Кеше Ақордада Қазақстан Республикасының Президенті Нұрсұлтан Назарбаевтың төрағалығымен Қауіпсіздік Кеңесінің мәжілісі өтіп, онда еліміздегі стратегиялық нысандардың қауіпсіздігі мен өмірлік қамтамасыз ету нысандарының жағдайы мәселелері қаралды. Осы жайтты қаузаған мақала «Егемен Қазақстан» газетінің сенбілік санында «Стратегиялық нысандардың қауіпсіздігі басты назарда» деген тақырыппен жарияланды. «Қазақстан Республикасының Президенті Н.Ә.Назарбаев, талқылауды қорыта келе, мемлекет қорларға, холдингтер мен даму институттарына өте үлкен қаржы бөлгенін, сондықтан осы ұйымдардың қызметінің тиімділігіне мониторинг жүргізуді және бақылау жасауды қамтамасыз ету қажеттігін ерекше атап көрсетті. Аталған мәселені талқылаудың қорытындысы бойынша Мемлекет басшысы Үкіметке, сот, құқық қорғау және өзге мүдделі мемлекеттік органдарға алдыға қойылған міндеттерді іске асыру жөніндегі қажетті шараларды жүзеге асыруды тапсырды», деп жазады басылым.
«Егемен Қазақстан» газетінің жазуынша, Елбасы Нұрсұлтан Назарбаев Түрік Республикасы Ұлы Халықтық Жиналысының (Парламенті) Төрағасы Мехмет Али Шахинді қабылдады. Әңгімелесу барысында экономика, сауда, саяси өзара іс-қимыл, сондай-ақ парламентаралық байланыстарды нығайту салаларындағы екіжақты ынтымақтастықтың кең ауқымды мәселелері талқыланды. Жоғары деңгейлі кездесу жайында басылымның бүгінгі нөміріндегі «Елбасының рөлі аталды» деген мақаладан біле аласыздар.
***
Біздің қоғамда «теңін тапса, тегін бер» деп, кейде жас жұбайлардың жарастығы үшін қыз баланы жат жұртқа қалың малсыз беру дәстүрі қалыптасқаны белгілі. Қыз баланың құнын үйір-үйір жылқымен пара-пар санап, ежелгі салтты ұстану да бар. Дегенмен қалың мал беру салтының әр аймақта әралуан екені, оны ұстануға келгенде жұрттың жікке бөлініп жататыны тағы бар. Заман ағымы мен адамдардың көзқарасы салттың өзінің бұрмалануына, оны әркімнің әрқалай қабылдауына әкеліп соқты. Азаматтарымыздың өмірінде елеулі орын алатын, әр отбасының негізін қалауға септігі тиетін салттың еліміздің барлық аймағы, барлық тұрғыны үшін бірізді болуы қажет пе? Бұл сауалдың жауабына қаныққыңыз келсе, «Алаш айнасы» газетінің тұрақты «Ой-көкпар» айдарындағы мамандар пікіріне назар салыңыз.
«Қызылжардан сәби күлкісі сирек естіледі». Осы тақырыппен «Алаш айнасы» газетінің сенбілік нөмірінде жарық көрген мақалада Қызылжарда бала туу көрсеткішін көтеру мақсатында «Ұрпақтар қоры» атты бағдарлама жүзеге асырылып жатқандығы әрі қыркүйектің 1-інен бастап облыста төртінші сәбиі дүниеге келген 26 отбасының 109 баласына депозит ашылып, әрқайсысының есепшотына 226 мың теңгеден ақша салынғандығы баяндалады. Басылымның жазуынша, бұл жағымды жаңалықты ата-аналармен кездескен облыс әкімі Серік Біләлов мәлімдеген.
***
«Есеп комитетінің төрағасы Омархан Өксікбаев жұрт назарын аударар деректер барын жария етті. Өксікбаевтың жауынгерлері күн-түн жорта жүріп, біраз жерге ревизиялық сапармен барып қайтыпты. Басты нысана - ревизиялық комиссиялар болған. Дәлірек айтсақ, Алматы, ШҚО, Қостанай, Маңғыстау және Павлодар облыстарындағы мәслихаттардың ревизиялық комиссияларының Елбасы бекіткен мемлекеттік қаржылық бақылау стандарттарын қаншалықты сақтап отырғандығы тексерілген. Нәтижесінде, көптеген тосын жайттар анықталыпты. Бас шайқатар деректер Өксікбаев ведомствосының, жергілікті бюджеттердің атқарылуын сыртқы бақылау жүйесінің тиімділігі мәселелеріне арналған кеңейтілген жиынында жария етілді», деп жазады «Айқын» газеті. Мақаланың байыбына барғыңыз келсе, басылымның сенбілік санындағы «Ревкомиссиядағы ретсіздіктер. Есеп комиеті елді елең еткізер мәлімет жариялады» деген тақырыпқа назар салыңыз.
Осы басылымның дәстүрлі «Ақ сөйле!» айдарының бүгінгі қонағы «Қазақ әдебиеті» газетінің бас редакторы, жазушы Жұмабай Шаштайұлымен арада өрбіген. Басылым тілшісінің барлық саулдарына тұщымды жауап берген ол: «Ең өткір мәселе - біздің екіжүзділігіміз. Баланың - әкенің, әкенің -баланың алдындағы, қыздың - шешенің, шешенің - қыздың алдындағы екіжүзділігі. Шаңырақты басқарып отырған адамның өзінің шындығы жоқ. Уақытша өмірдің ләззатына, уақытша табысқа алданатын ұлтқа айналып барамыз», депті. Екеуара әңгіменің толық нұсқасын «Үзеңгі жолдас» арқылы халыққа қатты танылдым» деген тақырыптан оқи аласыздар.
***
«Адам құқықтары жөніндегі уәкіл Асқар Шәкіров Варшава қаласында өткен гуманитарлық өлшем саласындағы ЕҚЫҰ Шолу конференциясына қатысты және «Ұлттық құқық қорғау институттары мен адам құқықтарын қорғауда азаматтық қоғамның ролі» атты баяндамасымен сөз сөйледі», деп жазады «Казахстанская правда» газеті. Басылымның атап өтуінше, қазақстандық омбудсмен өзінің сөз сөйлеуінде құқық қорғау қызметінде мемлекеттік органдар мен үкіметтік емес ұйымдардың тығыз және тиімді өзара әрекеттесу қажеттілігін қамтитын осы мәселедегі өз пікірімен бөліскен. Сондай-ақ конференцияның қатысушылары Қазақстанда осы үрдістің және ұлттық қорғау институтының медиаторы ретінде ондағы рөлінің дамуы барысымен танысқан.