АСТАНА. ҚазАқпарат - Бірқатар өңірлердің аумағын су басқанымен, оның көктемгі егіс науқанына кедергісі жоқ. Бұл туралы Астанада көктемгі егіс жұмыстарына арналған брифингте Өсімдік шаруашылығы өнімдерін өндіру мен қайта өңдеу және фитосанитариялық қауіпсіздік департаментінің директоры Мұрат Әсілбеков мәлім етті.
«Қарағанды және солтүстік өңірлерде бүгінде көктемгі егіс науқаны басталған жоқ. Атап айтқанда, бұл облыстарда егіс жұмыстары мамырдың екінші онкүндігінен басталады. Соған байланысты су деңгейінің көтерілуі егістік жұмыстарына еш әсер етпейді»,- деді ол.
Сонымен қатар Мұрат Әсілбеков Қарағанды облысының негізгі астық егетін аудандарын су баспағандығын атап өтті.
Руслан Ғаббасов
Ақмола облысының Біржан сал ауданында дүниеге келген. Л.Н. Гумилев атындағы Еуразия ұлттық университетінің журналистика факультетін бітірген. 2005 жылдан бері «ҚазАқпарат» халықаралық ақпарат агенттігінде жұмыс істеп келеді.