Су тасқынынан зардап шеккен қостанайлықтар үйлеріне оралуда

АСТАНА. ҚазАқпарат -Қостанай облысы Қарасу ауданындағы 4 елді мекендегі тұрғын үйлер судан тазартылды.

Адамдар өз үйлеріне оралуда. Су тасқынының салдарынан 4 елді мекендегі 36 үй мен аулалар су астында қалып қойды. Бұл туралы Қазақстан Республикасы ІІМ Төтенше жағдайлар комитетінің ресми өкілі Руслан Иманқұлов хабарлады.

 

Аудан аумағында қардың жаппай еруіне байланысты Жамбыл кенті әзірге су астында қалып тұр. Еріген қар суы 22 үй мен аулаларды басып қалды. Ұзындығы 200 метрлік 4 су бұрғыш канал қазылды. Тұрғын үйлер аумағындағы тасқын суды айдау, бұру және өткізу жұмыстары жалғасын табуда. Су тасқыны аймағындағы тұрғындарға алдын ала хабарландыру беріліп, эвакуациялау жұмыстары жүргізілді. Малдар қауіпсіз орындарға айдалды. Бұл жерлерде ТЖК бөлімшелерінің мамандары, жергілікті атқарушы органдар, Жергілікті полиция қызметі мен жұмылдырылған ұйымдар жұмыс жасап жатыр.

 

Еске сала кетейік, қостанайлық құтқарушыларға Жамбыл облысындағы әріптестері көмекке келді.