Сырдария өзеніне 5 жасар бала мен әкесі батып кетті
11:09, 08 Маусым 2018
ШЫМКЕНТ. ҚазАқпарат - Түркістанда Сырдария өзеніне 5 жасар бала мен әкесі батып кетті. Қазір өңірдің судан құтқарушылары әкесінің денесін іздестіріп жатыр, деп хабарлайды ҚазАқпарат тілшісі.
Облыстық ТЖД баспасөз қызметінің мәліметінше, әкесі баласымен 7 маусым күні шомылуға барған. Кешкі сағат 19.20-ларда абайсызда суға батып кеткен.
«7 маусым күні сағат 20:45-те Түркістан қаласы, Үшқайық ауылы маңындағы Сырдария өзеніне батып кеткен 1981 жылы туған ер азаматтың және 2013 жылғы баланың денесін іздестіру жұмыстарына ОҚО ТЖД «Жедел құтқару жасағы» ММ (5 қызметкер, 1 дана техника және 1 қайық) аттанды», - делінген хабарламада.
Белгілі болғандай, кеше, 8 маусым күні түнгі сағат 01:30 шамасында 20 адамнан тұратын туыстары бес жасар бүлдіршіннің денесін судан тауып шығарған. 37 жастағы әкесінің денесін іздестіру жалғасуда.