Тағы бір өзбекстандық Олимпиада чемпионы допинг ережесін бұзды деген күдікке ілінді
АСТАНА. KAZINFORM — Халықаралық тестілеу агенттігі (ITA) 2025 жылдың 11 маусымында жарыстан тыс допинг-тексеру кезінде өзбекстандық боксшы Лазизбек Мулложоновтан алынған сынамада анаболикалық-андрогендік стероид болып табылатын «метастерон» табылғанын хабарлады.
«Метастерон» субстанциясы Дүниежүзілік допингке қарсы агенттік (WADA) тыйым салынған заттар тізіміне енгізілген және C1.1 бабына сәйкес, кез келген уақытта — жарыста да, жарыстан тыс уақытта да қолдануға қатаң тыйым салынған. Бұл зат синтетикалық анаболикалық стероид болып табылады, ол адамның бұлшықет массасын, күш-қуатын жылдам арттыратын қасиеттерімен танымал.
Бұл жағдай туралы спортшы ресми түрде хабардар етілді және В үлгісін талдауды талап етуге құқылы. Егер В сынамасы дәл осындай нәтиже көрсетсе, бұл жағдай ресми түрде допинг ережесін бұзу ретінде расталады. Егер спортшы В үлгісін тексртпесе, бұл да заңбұзушылық болып саналады. Бұл ретте спортшыға нәтижеге қатысты пікір білдіру мүмкіндігі беріледі.
Сонымен қатар Дүниежүзілік бокстың допингке қарсы ережесінің 7.4.1 бабына сәйкес спортшыға міндетті түрде уақытша спорттан шеттету (provisional suspension) жазасы қолданылған. Спортшы бұл дисквалификацияға апелляциялық шағым беруге және оның күшін жоюды талап етуге құқылы.
Лазизбек Мулложонов 1999 жылы 13 мамырда дүниеге келген, (Ферғана облысы, Ферғана ауданы) — өзбекстандық әуесқой және кәсіпқой боксшы, бірінші ауыр және ауыр салмақ дәрежесінде өнер көрсетеді. Бокстан Өзбекстан ұлттық құрамасының мүшесі, 2024 жылғы Олимпиада чемпионы, Әлем чемпионатының қола жүлдегері (2023), Азия чемпионы (2022), әскери қызметкерлер арасындағы әлем чемпионы (2021), Өзбекстанның бірнеше дүркін чемпионы, халықаралық және республикалық әуесқойлар турнирлерінің бірнеше дүркін жеңімпазы және жүлдегері.
Оның BoxRec рейтингі бойынша ең жақсы позициясы — 93-орын (маусым 2025 ж.) және ауыр салмақ санатындағы өзбек боксшылары арасында 2-орын (Баходир Жалоловтан кейін), әлемнің ауыр салмақтағы боксшыларының ТОП-95-іне кірген.
Еске сала кетейік, өзбекстандық таэквондошы, екі дүркін Олимпиада чемпионы Улугбек Рашитов допингке қарсы ережелерді бұзғаны үшін екі жылға спорттан шеттетілгені жайлы жазған едік.