Талдықорғанда жастар төбелесі қайғылы аяқталды

ТАЛДЫҚОРҒАН. KAZINFORM — Талдықорғанда жастар арасындағы жанжал кезінде 2003 жылғы жігіт қарсыласын пышақтаған.

Бұл туралы облыстық Полиция департаментінің баспасөз қызметі мәлімдеді.

Оқиға 25 маусым күні Шығыс шағын ауданында болған. Әлеуметтік желілерде тараған бейнежазбада бірнеше жасөспірімнің төбелесіп жатқан сәті көрінеді. Жанжал кезінде 2003 жылы туған азамат қарсыласына пышақ сұғып, салдарынан бір жігіт оқиға орнында көз жұмған.

— Аталған дерек бойынша сотқа дейінгі тергеп-тексеру басталды. Күдікті ұсталып, уақытша ұстау изоляторына қамалды, — деп хабарлады полициядан.

Қазір оқиғаның барлық мән-жайы анықталып жатыр. Тергеу мүддесіне байланысты өзге ақпарат жария етілмейді.

Бұған дейін, Жетісуда жасөспірімдерге қатысты қылмыс 22,9 пайызға өскенін жазғанбыз.