Қайта қылмыстық құқық бұзушылықтардың алдын алу аясында аудан прокуратурасы, сот және пробация қызметі Талғар қаласының Мәдениет үйінде пробация есебінде тұрған және шартты түрде мерзімінен бұрын босатылған 200-ден астам адамның қатысуымен сот процестерін ұйымдастырды.
Талғар аудандық сотының қаулысымен пробациялық бақылауды қасақана бұзған екі В. және А. орта қауіпсіздік мекемелеріне өтелмеген мерзімінің бір бөлігін өтеуге жіберілді. Сот бұрын оларға ұрлық пен тонау ісі үшін бас бостандығын шектеу туралы үкім шығарған.
«Үйде түнгі уақытта болу түріндегі заңнамалық шектеулерге, ойын-сауық мекемелеріне баруға және пробация қызметіне ескертусіз аудан аумағынан шығуға тыйым салынғанына қарамастан, аталған адамдар басқа өңірлерде, соның ішінде түнгі уақытта да заңды бірнеше рет бұзған», — деп хабарлады облыстық прокуратура.
Еске салайық, бұған дейін Алматы облысында алиментке 2,7 млн қарыз азамат қамауға алынғанын жазғанбыз.