«Тәлімгерлер» бағдарламасына 10 жыл: Қазақстанда алғашқы республикалық форум өтті
АСТАНА. KAZINFORM — Алматыда ата-анасының қамқорлығынсыз қалған және жетім балаларға арналған тәлімгерлік тақырыбындағы алғашқы республикалық форум өтті, деп хабарлайды «Дара» қайырымдылық қорының баспасөз қызметі.
«Наставники — Тәлімгерлер»: Қазақстан Республикасында 10 жыл» атты форум балалар үйлерінің тәрбиеленушілерін әлеуметтендірудің тиімді құралы ретінде тәлімгерлікті дамыту мен қолдауды талқылау үшін мемлекеттік органдардың, бизнестің, ҮЕҰ мен халықаралық ұйымдардың өкілдерін біріктірді.
Форумға ҚР Парламенті Мәжілісінің Әлеуметтік-мәдени даму комитетінің төрағасы Асхат Аймағамбетов; ҚР Оқу ағарту министрлігі Балалардың құқықтарын қорғау комитетінің төрағасы Насымжан Оспанова; ҚР Бала құқықтары жөніндегі уәкіл Динара Зәкиева; Ислам Даму Банкін қоса алғанда, бизнес және халықаралық ұйымдардың өкілдері қатысты.
Іс-шара «Дара» қайырымдылық қорының «Тәлімгерлер» бағдарламасының 10 жылдығына орайластырылды. Тәлімгер — бұл балалар үйіндегі жасөспіріммен тәжірибе бөлісетін, оған ересек өмір сүру дағдыларын игеруге көмектесетін, қиын сәттерде қолдау көрсететін және болашақты таңдауда көмектесетін ересек адам. Тәлімгер болу үшін Қазақстан азаматы арнайы оқудан өтіп, белгілі бір талаптарға сай болуы керек.
— Қазақстанда тәлімгерлік институтының дамуы мемлекеттің, үкіметтік емес ұйымдардың және белсенді азаматтардың күш-жігерін біріктіру арқасында мүмкін болды. Тәлімгерлік институтын бекіту үшін ауқымды жұмыс атқарылды: Бала құқықтары туралы заңға өзгерістер енгізілді, бірнеше нормативтік-құқықтық актілер қабылданды. Бұл іс-шара жай ғана шара емес — ол тәлімгерлік институтының жаңа деңгейге көтерілгенін, қоғамда мойындалып, дұрыс түсініле бастағанын көрсетеді. Бүгін жиналған адамдар жақсы біледі: баланың өмірінде ең маңыздысы — жанашырлықпен жанында болатын ересек адам. Дәл осы қамқорлық пен қолдау балаға өмір бойы арқа сүйейтін негіз бола алады, — деді Балаларды қорғау жөніндегі комитеттің төрайымы Насымжан Оспанова.
«Дара» қоры 2015 жылдан бері жүзеге асырып келе жатқан «Тәлімгерлер» бағдарламасы балалар үйінің тәрбиеленушілерін тәлімгерлерімен қауыштырып, сол арқылы балаларды қолдау мен әлеуметтендіруді көздейді. Бүгінде бағдарлама Қазақстанның 18 қаласында жұмыс істеп, 360-тан астам жасөспірімге дербес өмірге қадам басуға көмектесті. Бағдарламаның ауқымы жыл сайын кеңейіп, қатысушылар саны артып келеді.
Бағдарлама алғаш рет Астана, Алматы және Қарағанды қалаларында іске қосылды. Сол кезде Қарағанды облысы Білім басқармасының басшысы болған Асхат Аймағамбетов ұзақ жылғы жұмыстың нәтижелері мен тәлімгерлікті заңнамалық деңгейде бекіту маңыздылығы туралы айтып өтті.
— Он жыл ішінде біз тәлімгерлік жобасының тұрақты, тиімді және шын мәнінде қажетті екеніне көз жеткіздік. Бұл жобаны заң деңгейінде неге бекіту қажет? Ең алдымен әрбір тараптың, барлық мүдделі тараптардың жауапкершілігі мен құқықтарын бекіту үшін. «Тәлімгерлер» бағдарламасының тәжірибесі барлық негізгі аспектілерді ескеруге мүмкіндік берді: кім тәлімгер бола алады, оның құқықтары мен міндеттері қандай, тәлімгерлер мектебі қалай жұмыс істейді, сертификаттау мәселелері және барлық тараптардың, соның ішінде мемлекеттік органдардың жауапкершілігі. Бағдарламаның көпжылдық тәжірибесі заңнамалық түрде қандай нормаларды бекіту маңызды екенін көрсетті, — деді Асхат Аймағамбетов.
Форум барысында тәлімгерлер мен олардың тәлім алушылары сөз сөйледі. Олар өзара достықтары жайлы айтып, баланың сеніміне қалай ие болғандарын, оның бойындағы қабілеттерді қалай ашқандарын және өзіне деген сенімділікті қалыптастыруға қалай көмектескендерін бөлісті. Сондай-ақ тәлім алушылар ересек өмірдегі нақты жетістіктері туралы әңгімелеп, тәлімгерліктің өмірлеріндегі маңызын атап өтті.
— Тәлімгерлер» бағдарламасы — айқын әдістеме мен кәсіби команда. Біз көп жетістікке жеттік, бірақ тоқтап қалмаймыз, өйткені әрбір оған мұқтаж жасөспірімнің өз тәлімгері болуы керек екеніне сенімдіміз, — деді «Дара» қайырымдылық қорының негізін қалаушы Гүлнар Досаева.
Бұдан бұрын хабарланғандай, Қазақстанда жетім балаларға арналған тәлімгерлер үшін міндетті сертификаттау енгізілді.