«Таңғы тазалық қозғалысы»: Жамбыл облысында жаңа бастама бастау алды

Фото: Фото: Жамбыл облысы әкімдігі

АСТАНА. KAZINFORM –  Жамбыл облыстық Өңірлік коммуникациялар қызметі «Таңғы тазалық қозғалысы» атты ерекше әрі тың бастаманы қолға алды . Бұл жоба пайдалы және ұтымды дүниені ұштастыра отырып, әр таңды сергектікпен әрі жауапкершілікпен бастау идеясынан туындаған.

Жоба «Әр таң — мүмкіндік! Әр таң — тазалық!» атты ұранмен өтіп жатыр.

Бес күннен бері жалғасып келе жатқан бұл қозғалыс күн сайын кеңейіп келеді. Алғашында тек қызметкерлер қатысқанымен, қазір аулаларды тазарту барысында тұрғындар да қызығушылық танытып, ерікті түрде қосыла бастаған. Бұл қоғамда экологиялық және азаматтық жауапкершілікке деген қызығушылықтың артып келе жатқанын көрсетеді.

Жобаның басты мақсаты — таңғы дене жаттығуынан кейін қоршаған ортаны тазалау мәдениетін қалыптастыру арқылы қоғамға үлгі көрсету. Сонымен қатар бұл бастама республикалық «Таза Қазақстан» акциясымен үндесіп, барша тұрғынды белсенділікке шақырады.

«Таңғы жаттығу — өз денсаулығымыз үшін жақсы әдет. Ал одан кейінгі тазалық — қоғам үшін үлкен жауапкершілік»

Бастама саябақты ұжымдық тазалаудан басталды. Ал кейінгі күндері қызметкерлер өз аулаларын немесе көшелерін тазалап, бұл сәттерді бейнежазбаға түсіріп, күн сайын ортақ чатқа немесе әлеуметтік желіге жүктейді. Ең бастысы — әрбір таңғы тазалық біріккен бейнероликке айналып, шабыт беретін контент ретінде жарияланып отырады.

Қозғалыс барысында аулаларда жүрген қызметкерлердің әрекетін көрген тұрғындар да қосыла бастады. Бұл — тазалықтың жұқпалы екенін, жақсылықтың үлгі арқылы таралатынын тағы бір мәрте дәлелдейді.

Бұл жобаның нәтижесінде азаматтар жеке мәдениетін жетілдіріп, қоғамдық сана-сезімі мен жауапкершілігі артады.  Жамбыл облысы осы бастама арқылы «Таза Қазақстан» акциясына нақты үлес қосып отыр.

Бұл қозғалыс — жай тазалық емес. Бұл — сана, мәдениет пен жауапкершілікке бастар жол. Сондықтан Жамбыл облыстық Өңірлік коммуникациялар қызметі бұл эстафетаны облыс тұрғындарына және еліміздегі барлық Өңірлік коммуникациялар қызметтеріне жолдайды.

Таңды жақсы іспен бастайық! Әр таң — жаңа мүмкіндік!