Таразда орта жастағы әйелден 42 келі есірткі тәркіленді
ТАРАЗ. КАZINFORM - Жамбыл облысының полициясы Тараз қаласының аумағында есірткі заттарын өткізетін арнаны жойды.
Облыстық полиция департаменті баспасөз қызметінің хабарлауынша, тыйым салынған заттардың аса ірі көлемі 58 жастағы әйелден тәркіленген.
Оның тұрғылықты жерін тінту кезінде жуынатын бөлме мен жатын бөлмеден, жертөледен, сондай-ақ көлігінен барлығы 19 келі 335 гр гашиш және 22 келі кептірілген марихуана тәркіленген.
"Күдікті өз кінәсін толық мойындады. Қазіргі уақытта сотқа дейінгі тергеу амалдары жүргізілуде. Әйел есірткіні туған ауылы - Меркі ауданынан әкелген. Ол өзімен бірге тұратын туыстарын да есірткіге тәуелді еткісі келгенін мойындады", - деді Жамбыл облысы ПД есірткі қылмысына қарсы іс-қимыл басқармасының бастығы Әлім Бажықбаев.
Бұған дейін Жамбыл облысының есірткі қылмысына қарсы бөлімше бастықтары қамауға алынғанын хабарлаған болатынбыз.