Салтанатты шараға қатысқан Алматы әкімі Бақытжан Сағынтаев
медицина қызметкерлерін алдағы Тәуелсіздік күнімен құттықтап, заманауи КТ-орталықтарын ашу жедел араласуды талап ететін шұғыл аурулар кезінде патологияларды диагностикалау және ерте анықтау бойынша халыққа қадамдық қолжетімділікті қамтамасыз ететінін атап өтті.
Орталықта мәлімдегендей, 64 тілімдегі компьютерлік томограф жоғары жылдамдықпен сканерлеуді орындайды. Аппараттың жұмыс істеуі КТ-зерттеулерін басқа емдеу ұйымдарына жіберу қажеттілігін айтарлықтай төмендетеді.
«Жаңа томограф пандемия кезінде зерттеу кезектерін едәуір жеңілдетеді. Аппараттың қуаттылығы күніне 40-қа жуық адамның тексеруден өтуін қамтамасыз етуге мүмкіндік береді. Бұл біздің тұрғындарға медициналық көмек көрсету сапасын жақсартады», - деді Наурызбай ауданының медициналық ұйымдарының басшысы Гүлжанат Тілеген.
№36 емхана жанындағы КТ орталығы тек Наурызбай ауданының ғана емес, сондай-ақ, Әуезов, Алатау аудандарының, Алматы облысының Қарасай ауданының тұрғындарына да қызмет көрсететін болады.
Алматы әкімдігінің мәліметінше, бүгінде Алматы қаласының денсаулық сақтау нысандарын жабдықтау көрсеткіші 91,5%-ға жетті. Анестезиология, реанимация және қарқынды терапия бөлімшелерінің жабдықталуы 100%-ға дейін жеткізілді. Жедел медициналық жәрдем жұмысы жақсарды. 3 жаңа қосалқы станция салынды. Бригадалар саны екі есеге артты. Автопарк 70% жаңартылды.
Тұңғыш Президент – Елбасы Н. Назарбаевтың тапсырмасы бойынша ағымдағы және ықтимал эпидемиологиялық қатерлерге ден қою бойынша елдің ғылыми-медициналық әлеуетін шоғырландыру мақсатында Алматыда инфекциялық аурулардың көпбейінді ғылыми-зерттеу орталығының құрылысы басталды.
Ағымдағы жылы үш емхананың, 9 отбасылық-дәрігерлік амбулаторияның құрылысы басталды. Балаларға шұғыл көмек көрсету орталығының және №2 ҚБКА қосымша корпустарының құрылысы, паллиативтік көмек орталығы бар жаңа онкологиялық орталықтың және Медеу ауданында көпбейінді стационар салынуда.
250 төсектік Балаларды оңалту орталығын және 50 төсектік ерте араласу орталығын орналастыру үшін бұрынғы Алматы темір жол ауруханасын қайта жаңарту және күрделі жөндеу жоспарлануда.