ОРАЛ. ҚазАқпарат – Орал қаласында Тәуелсіздіктің 30 жылдығы аясында бокстан ерлер арасында Қазақстан чемпионаты өтеді, деп хабарлайды ҚазАқпарат тілшісі.
БҚО дене шынықтыру және спорт басқармасының баспасөз қызметі мәлім еткеніндей, ел біріншілігі қаладағы теннис орталығында 15 желтоқсан күні басталып, 23-інде мәреге жетеді.
Жыл соңындағы айтулы додаға Нұр-Сұлтан, Алматы, Шымкент қалалары мен Ақмола, Ақтөбе, Алматы, Атырау, Жамбыл, Қарағанды, Қостанай, Қызылорда, Маңғыстау, Павлодар, Солтүстік Қазақстан, Түркістан, Шығыс Қазақстан және Батыс Қазақстан облыстарынан 300-ге жуық боксшы қатысып, чемпиондық атақты сарапқа салмақшы.
Бокстан БҚО құрамасының аға жаттықтырушысы Саттар Сұлтанғалиевтің айтуынша, біріншілікте 13 салмақ дәрежесі бойынша боксшылар рингке шығады. Батыс Қазақстан облысының намысын 11 спортшы қорғайды деп жоспарланып отыр. Олардың арасында өткен жылы 18 жасында Қазақстан чемпионы, биыл Азия біріншілігінің күміс жүлдегері атанған Даниял Сәбит бар. Даниял 48 кг салмақта бақ сынайды.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).