Таяу Шығыстағы жағдай: Сауд Арабиясындағы ең ірі мұнай өңдеу зауыты жұмысын тоқтатты

АСТАНА. KAZINFORM – Оқиға аймақтағы шиеленістің артуы аясында орын алып, мұнай бағасының өсуіне себеп болды, деп хабарлайды Kazinform-ның Иорданиядағы меншікті тілшісі.

Дүйсенбі күні таңертең Даммам қаласының Рас-Танура портындағы Saudi Aramco компаниясының нысандарында ұшқышсыз ұшу аппараттарының шабуылынан кейін өрт шықты. Кәсіпорын үстінен қою түтін шыққаны байқалды. 

Reuters агенттігінің салалық дереккөзге сілтеме жасап хабарлауынша, мұнай өңдеу зауыты сақтық шарасы ретінде уақытша жабылды. Жағдай бақылауға алынды.

Сауд Арабиясы Қорғаныс министрлігі өкілінің мәлімдеуінше, нысанға шабуыл жасамақ болған екі ұшқышсыз аппарат жойылған. Қирандылардан шыққан өрт сөндірілді. Зардап шеккендер жоқ.

Парсы шығанағы жағалауында орналасқан Рас-Танура кешені Таяу Шығыста қуаты тәулігіне шамамен 550 мың баррельді құрайтын, Сауд Арабиясы мұнайының негізгі экспорттық терминалы болып табылатын ең ірі мұнай өңдеу зауыттарының бірін қамтиды.

Оқиға АҚШ пен Израильдің Иранға қарсы операциясы басталғаннан бері екіжақты шабуылдардың салдарынан болды. Энергетикалық инфрақұрылым нысандарына шабуылдар мен Ормуз бұғазы арқылы кеме тасымалының үзілуі туралы хабарламалар аясында Brent мұнайының фьючерстері шамамен 10%-ға өсті.

Reuters агенттігінің хабарлауынша, Verisk Maplecroft компаниясының талдаушысы Торбьорн Солтведт Рас-Танураға жасалған шабуыл Парсы шығанағы мемлекеттеріндегі энергетикалық инфрақұрылымның басым нысанаға айналып келе жатқанын көрсететінін, бұл Эр-Рияд пен басқа да аймақтық мемлекеттердің әскери әрекеттерге қатысуын арттыруы мүмкін екенін атап өтті.

Айта кетейік, осыған дейін Иранның қауіпсіздік басшысы елдің АҚШ-пен келіссөздер жүргізбейтінін мәлімдеді және Дональд Трампты Израиль мүддесін бәрінен жоғары қойды деп айыптады.