Тбилисиден Алматыға ұшқан Air Astana ұшағы Бакуге шұғыл қонды

АСТАНА. KAZINFORM – Тбилисиден Алматыға ұшқан Air Astana әуе компаниясына тиесілі Airbus A321 ұшағының капитаны Гейдар Әлиев халықаралық әуежайына шұғыл қонуды сұрады. Бұл туралы әуежайдың баспасөз қызметі хабарлады, деп жазды Trend.az. 

Trend-тің хабарлауынша, бұған борттағы жолаушылардың бірінің денсаулығының күрт нашарлауы себеп болған. 

Өтінім бойынша әуежайдың дағдарыс орталығы жұмылдырылып, жерүсті қызметтері жедел үйлестіріліп, барлық қажетті қауіпсіздік шарасы қабылданды. Ұшақ жергілікті уақыт бойынша 00:25-те сәтті қонды. 

Жолаушыға дереу медициналық көмек көрсетілді. Ол жедел жәрдем бригадасына тапсырылып, одан әрі тексеру үшін қалалық ауруханалардың біріне жеткізілді.

Атап өтілгендей, «Air Astana» әуе компаниясының шешімімен рейстің межелі жерге аттандырылуы кейінге шегерілді. Қалған жолаушылар қонақүйге орналастырылды.

Еске сала кетейік, бұған дейін Гондураста шағын ұшақ апатқа ұшырағанын хабарлаған едік.