02:08, 25 Қазан 2014

Теннис: А.Голубевті ұтқан Б.Чорич Р.Надальды да жеңіп кетті

АСТАНА. ҚазАқпарат - Швейцарияның Базель қаласында теннистен өтіп жатқан халықаралық турнирде әлемнің екінші ракеткасы, испандық Рафаэль Надаль ширек финалда аяқ астынан хорват Борна Чоричтен ұтылып қалды.

Әлемдік рейтингте 124-інші орында тұрған Загреб қаласының 17 жасар түлегі атақты қарсыласын 6:2, 7:6 есебімен жеңді. Б.Чорич үш рет брейк жасап, бір мәрте өзі доп берген геймде есе жіберді. Хорват теннисшісі осы жарыс барысында турнирдің алтыншы ракеткасы, латвиялық Эрнест Гулбисті, содан кейін қазақстандық теннисші Андрей Голубевті 6:4, 6:4 есебімен тізе бүктірген болатын. Енді Б.Чорич өз өмірінде алғаш рет ATP турнирінің финалына шығу үшін осы жарыстың жетінші ракеткасы, бельгиялық Давид Гоффенмен шеберлік байқасады. Еске сала кетейік, Базель турнирінде М.Кукушкин де екінші айналымнан аса алмаған болатын.

Спорт
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).