НҰР-СҰЛТАН. ҚазАқпарат – Кәсіби теннисшілер қауымдастығы (ATP) әлемдегі үздік ойыншылардың жаңартылған рейтингісін жария етті, деп хабарлайды ҚазАқпарат тілшісі.
Қазақстан теннис федерациясы мәлім еткеніндей, еліміздің бірінші ракеткасы Александр Бублик 37-ден 35-орынға көтерілді.
Осылайша ол өзінің дүниежүзілік рейтингтегі рекордтық көрсеткішіне (34) бір табан жақындады.
Михаил Кукушкин 149-дан 147-ге, Дмитрий Попко 165-тен 163-ке, Тимофей Скатов 271-ден 269-ға, Денис Евсеев 406-дан бірден 370-орынға жоғарылады.
Жұптық сында Андрей Голубев 36-ыншы, Александр Недовесов 77-сатыда келеді.
А.Бублик Мәскеуде бүгін басталатын Кремль кубогы жарысында өнер көрсетеді. Оның алғашқы қарсыласы – іріктеу сайысы жеңімпаздарының бірі, украиналық Илья Марченко.
Еске сала кетейік, бұдан бұрын Елена Рыбакинаның жұптық рейтингіде бірден 47 саты жоғары көтерілгенін жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).