НҰР-СҰЛТАН. ҚазАқпарат – Қазақстанның бірінші, әлемнің 39-ракеткасы Александр Бублик Истбурн (Ұлыбритания) ATP 250 турнирінің жартылай финалына өте алмады, деп хабарлайды ҚазАқпарат тілшісі.
Қазақстандық теннисші ширек финалда әлемнің 27-ракеткасы, италиялық Лоренцо Сонегомен күш сынасты.
Италиялық спортшы 6:1, 7:5 есебімен жеңіске жетті.
Бәсеке 1 сағат 17 минутқа созылды.
А.Бублик матч барысында 8 эйс жасап, екі брейк-пойнттың біреуін ғана пайдаланды. Қарсыласы 3 эйс, 4 брейк жасай алды.
Жүлде қоры 547265 еуроны құрайтын жарыстың финалына шығу үшін Л.Сонего әлемнің 95-ракеткасы, тағы бір италиялық Андеас Сеппи немесе рейтингте 283-орында тұрған аустралиялық Макс Перселдің біреуімен таласады.
Бұл Уимблдон турнирі алдындағы соңғы дода болып табылады.
Еске сала кетейік, бұдан бұрын А.Бубликтің Истбурн турнирінің ширек финалына шыққанын, Е.Рыбакинаның әлемнің бесінші ракеткасын ұтқанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).