НҰР-СҰЛТАН. ҚазАқпарат – Қазақстандық Александр Недовесов жұптық сында Марракеш (Марокко) ATP 250 турнирінің жартылай финалына шықты, деп хабарлайды ҚазАқпарат тілшісі.
Қазақстандық теннисші пәкстандық Айсам Курешимен бірге ширек финалда италиялықтар Марко Чеккинато – Лоренцо Музеттимен күш сынасты.
Қазақстандық-пәкстандық жұп бірінші партияда брейк жасау арқылы басымдылығын танытты – 7:5.
Екінші сетте есеп 4:3 болған мезетте тағы бір брейкке қол жеткізіп, матчты жеңіспен тәмамдады – 6:3.
Бір сағаттан астам уақытқа созылған бәсеке барысында Недовесов пен Куреши 3 эйспен бірге 7 брейк-пойнттың екеуін пайдалана білді. Олардың жартылай финалдағы қарсыластары бүгін анықталады.
Еске сала кетейік, бұдан бұрын қазақстандық теннисшілердің Мароккодағы жарыстың ширек финалына шыққанын, Елена Рыбакинаның АҚШ-тағы турнирдің үшінші айналымына өте алмағанын жазған болатынбыз.
Сондай-ақ Қазақстан жасөспірімдер құрамасы Аустралияға жол берді.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).