ОРАЛ. 19 қаңтар. ҚазАқпарат - Мельбурнда өтіп жатқан Австралияның ашық чемпионатында бүгін сербиялық Ана Иванович әлемнің бірінші ракеткасы Серена Уильямсты ұтты.
Рейтингте 14-інші болып тұрған А.Иванович Серенаға қарсы ойын тактикасын дұрыс құра білді. Әсіресе, екінші, үшінші партияда әдемі де тапқыр ойынымен қарсыласын тұсап тастады. Сөйтіп 4:6, 6:3, 6:3 есебімен Серена Уильямсты жеңген Ана Иванович ширек финалға жолдама алды. Мұны сенсациялық оқиға деуге болады. Өйткені С.Уильямс көптен бері жеңіліп көрмеген еді әрі А.Иванович атақты американдық теннисшіні бұған дейін бір партияда төрт геймнен артық ұта алмапты.
Сонымен, осыған дейін Австралияның ашық чемпионатын бес рет ұтқан Серена жарыс жолынан шығып қалды. Бұл - кезінде өзі де бірінші ракетка болған А.Иванович, ресейлік Мария Шарапова, белоруссиялық Виктория Азаренко және басқа теннисшілерге жол ашылып отыр деген сөз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).